Канада бош вазири мамлакат АҚШ билан урушга тайёрланаётганини тан олди
**Канада бош вазири мамлакат АҚШ билан урушга тайёрланаётганини тан олди**
Канада бош вазири Марк Карни Оттава АҚШнинг мамлакатга эҳтимолий ҳужумига ҳозирлик кўраётганини, жумладан, турли мудофаа ссенарийлари ишлаб чиқилаётганини тан олди. Унинг айтишича, бу ишлар Қўшма Штатлар президенти Доналд Трампнинг таҳдидларидан кейин ўтган бир йил давомида олиб борилган.
Бош вазир бу ҳақда Тҳе Нев Ёрк Тимес нашрига берган интервюсида гапирди. Трампнинг Канадани “51-штат”га айлантириш ҳақидаги таҳдидларига Оттава қанчалик жиддий ёндашгани ҳақидаги саволга Карни ҳукумат босқин эҳтимолини синчиклаб кўриб чиққанини айтди.
“Бундай лавозимда ўтирган одам ҳар қандай кутилмаган фавқулодда ссенарийларни ўйлаб қўйиши шарт. Бу хавфларни бошқаришдир. Албатта, бу асосий режа эмас, лекин бунга тайёргарлик кўрмаслик масъулияцизлик бўларди”, деди Карни.
**Оттава АҚШга қарамликни камайтирмоқда**
Бош вазирнинг сўзларига кўра, бундай таҳдидлар Канадани АҚШга қарамликни кескин қисқартиришга мажбур қилган. Хусусан, Канада Илон Маскнинг Старлинк сунъий йўлдош алоқа тизимидан бутунлай воз кечишни режалаштирмоқда.
Шунингдек, мамлакат Арктика мудофааси учун АҚШнинг 88 та Ф-35 қирувчи самолётини харид қилиш ўрнига, Европа самолётларини, жумладан Швециянинг Сааб Грипен қирувчиларини танлаш имкониятини кўриб чиқмоқда.
**Иқтисодий ва сиёсий келишмовчиликлар**
АҚШ ва Канада ўртасидаги муносабатлар 2025-йилда Трамп Канада товарларига 25 фоизлик божлар жорий этганидан кейин кескин ёмонлашди. Бунга миллий хавфсизликка таҳдидлар ва гиёҳванд моддалар контрабандаси сабаб қилиб кўрсатилди.
2026-йил август ойида мамлакатлар бир-бирининг маҳсулотларига 50 фоиздан божлар солди. Бу томонлар ўртасидаги савдо музокаралари АҚШ Савдо вазири Ҳовард Лутникнинг позицияси сабаб охирги дақиқада барбод бўлгани ортидан юз берди.
Сентябр ойида Европа Иттифоқи Канадага унинг тарихдаги биринчи ассоциацияланган аъзоси бўлишни таклиф этди. АҚШ президенти Доналд Трамп бу таклифдан норози бўлиб, Европа Иттифоқига қарши божларни ошириш билан таҳдид қилди. Трамп Канадани АҚШ таркибига қўшиб олиш ғоясини бир неча бор илгари сурган ва уни 51-штат деб атаган.