Калифорниялик эр-хотин суррогат оналардан туғилган камида 14 нафар болага нисбатан шафқатсиз муносабатда бўлганликда айбланмоқда
Ўтган йили қарамоғидан 21 нафар бола олиб қўйилганидан кейин Гожун Сюань ва Сильвия Чжань Аркадиядаги ҳашаматли уйида ҳибсга олинди.
Калифорниялик эр-хотин суррогат оналик орқали туғилган камида 14 нафар болани қийноққа солишда, шунингдек, гувоҳни фикридан қайтаришга уринишда айбланмоқда. Болаларнинг айримлари бор-йўғи икки ойлик бўлган.
«Бу даҳшатли зўравонликка дучор бўлган болалар сони мисли кўрилмаган даражада кўпдир», деди Лос-Анжелес округ прокурори Натан Ж. Хочман ўз баёнотида.
АҚШ ОАВлари эр-хотин деб таърифлаётган Гожун Сюань ва Сильвия Чжань сешанба куни Аркадиядаги ҳашаматли уйида ҳибсга олинган.
Би-би-сининг АҚШдаги ҳамкори CBS News хабарига кўра, Пасадена судида эр-хотин ўз айбларини тан олмаган.
66 ёшли Сюань ва 39 ёшли Чжань ўтган йили уларнинг қарамоғидан 21 нафар бола олиб қўйилганидан кейин, ўз уйларида яшаган 16 нафар боладан 15 нафарини мунтазам равишда жисмоний зўравонликка дучор қилиш учун тил бириктирганликда айбланмоқда.
Жиноий даъво аризасига кўра, эр-хотин ўзларининг суррогат оналик бизнесини юритган ва суррогат она бўлган камида икки аёлга Чжань ҳомиладор бўлишда қийинчиликларга дуч келаётганини айтиб, ёлғон маълумот берганликда айбланмоқда.
2025 йил май ойи ҳолатига кўра, Чжань 21 нафар болани, жумладан, суррогат оналардан туғилганларни кузатиб бориш учун электрон жадвал юритган.
Расмийларнинг билдиришича, тергов ўша ойда, Чжань икки ойлик чақалоқни бош жароҳати билан шифохонага олиб бориб, тиббиёт ходимларига бола каравотдан йиқилиб тушганини айтганидан кейин бошланган.
Эр-хотиннинг адвокати Митчелл Кремс у ўрганиб чиққан далилларга таяниб, бу айбловни «нотўғри талқин қилиш» деб атади, деб хабар берди Лос-Анжелесдаги CBS News.
Шифохона ходимлари ҳуқуқ-тартибот идораларини огоҳлантирган ва полиция уйга борганида «ўқув марказлари» деб таърифланган ва бир нечта энагалар томонидан назорат қилинадиган учта алоҳида хонани топган. Хочман бу уйни «даҳшатлар уйи» деб атади.
Уйда ҳаракатга сезгир 32 та камера бўлган бўлиб, Хочманнинг сўзларига кўра, эр-хотин улардан энагалар томонидан қўлланиладиган жазо чораларини назорат қилиш учун фойдаланган.
Тасвирларда энагалар болаларни ураётгани, тарсакилаётгани ёки калтаклаётгани акс этгани айтилмоқда.
Энагалардан бири, Чунмей Ли, бош жароҳати олган икки ойлик чақалоқни шифохонага олиб борилишидан икки кун олдин урганликда айбланмоқда.
Кремснинг айтишича, Ли зудлик билан ишдан бўшатилган, деб хабар берди CBS News LA.
58 ёшли Ли аввалроқ оғир тан жароҳати етказиш ёки ўлимга олиб келиши мумкин бўлган шароитларда болага нисбатан зўравонлик қилиш жиноятида айбланган эди. Хочманнинг айтишича, у қочиб юрибди ва уни ҳибсга олиш учун 105 000 долларлик (£88 800) ордер берилган.
2025 йил июль ойида расмийлар биринчи марта эр-хотиннинг уйида тинтув ўтказиб, 21 нафар болани давлат қарамоғига олган эди.
Дастлабки тинтув вақтида Аркадия полиция департаменти болаларнинг ёши икки ойликдан 13 ёшгача бўлганини, бироқ уларнинг аксарияти бир ёшдан уч ёшгача бўлганини маълум қилган.
Болаларнинг 15 нафари эр-хотиннинг уйидан олиб кетилган, қолган олти нафари эса бошқа жойда яшаган ва кейинчалик улар ҳам васийликка олинган.
Кремс унинг ҳимояси остидаги Сюань айбсиз эканини айтди.
«У кўп фарзандли бўлиш бўйича конституциявий ҳуқуқидан фойдалангани учун нишонга олинмоқда», дея адвокатнинг сўзларидан иқтибос келтирди CBS News.
Терговчиларнинг фикрича, суррогат оналар бутун мамлакат бўйлаб келган ва бир вақнинг ўзида эр-хотин учун эмбрионларни кўтариб юрганларини билишмаган.
Суррогат оналардан икки нафарининг адвокати Мелисса Брисман CBS News телеканалига шундай деди: «Бу жуда яхши янгилик, одамлар ўз қилмишлари учун жавобгарликка тортилади ва агар сиз суррогатлик тизимини суиистеъмол қилсангиз, бунинг оқибатлари бўлади».
Агар айбдор деб топилса, Сюань давлат қамоқхонасида максимал 17 йил-у тўрт ойлик, Чжань эса 11 йил-у саккиз ойгача озодликдан маҳрум этилиши мумкин. Ли эса 12 йилгача қамоқ жазосига маҳкум этилиши мумкин.