Журналистлар танлови: ҳаётга бошқача қарашга ундайдиган 10 та филм

**Журналистлар танлови: ҳаётга бошқача қарашга ундайдиган 10 та филм**

Соллидер сайти томошабин дунёқарашига жиддий таъсир қилиши ёки уни ўз ҳаётига бошқача назар билан қарашга мажбур этиши мумкин бўлган 10 та филм рўйхатини эълон қилди. Муаллифлар таъкидлашича, бу ерда фақат руҳлантирувчи асарлар ҳақида гап кетмайди: рейтингга кирган айрим филмлар, аксинча, оғир туйғуларни уйғотиб, одамни пессимист кайфиятга солиб қўйиши ҳам мумкин.

Биринчи поғонани Акира Куросаванинг 1952-йилда суратга олинган “Яшаш” филми эгаллади. Асарнинг бош қаҳрамони — ўзига ўлим ташхиси қўйилганини билиб қолган ва умрининг катта қисмини шунчаки бир хил маромда ўтказганини англаб етган амалдор. Яқинлашиб келаётган ўлимни ҳис этиши уни чинакам муҳим иш қилишга ундайди. Журналистлар фикрича, филм жуда кеч бўлмасидан ҳаракат қилиш кераклиги ҳақида сўзлайди, бироқ буни ҳаққоний тарзда, ҳеч қандай панд-насиҳат ва очиқ чақириқларсиз етказади.

Иккинчи ўринни Стивен Кинг асарларидан бири — “Шоушенкдан қочиш” эгаллади. Сюжет марказида ҳаётга турлича қарайдиган, аммо аста-секин яқин дўстларга айланувчи икки маҳбус туради. Соллидер нашри филмни умид, дўстлик ва ҳатто ўта оғир шароитларда ҳам яшашни давом эттириш иродаси ҳақидаги ҳикояси сабаб бундай рўйхатларнинг деярли ажралмас қисми деб ҳисоблаган.

Кучли учликни давомийлиги бир соатдан сал кўпроқ бўлган “Қандай ажойиб кун” анимацион филми якунлайди. Унда аста-секин онгининг бир қисмини йўқотиб бораётган Билл исмли оддий инсон ҳақида ҳикоя қилинади: унинг кундалик ҳаёти тобора мураккаблашиб боради, хотиралари эса хиралашади. Бу ерда минималистик анимация ва деярли йўқ диалоглар қора ҳазил билан уйғунлашган, бироқ финалга келиб ғамгин ва ҳиссий эпизодлар комедиядан анча устун келади.

Рейтингнинг бошқа иштирокчилари орасида таътилга бирга йўл олган қиз ва унинг отаси ҳақидаги “Менинг қуёшим” филми ҳам бор. Филм давомида деярли ҳеч қандай муҳим воқеа юз бермайди, аммо финалга яқин сюжет аввал кўринганидан анча оғир ва чуқур маъноли тус олади.

Рўйхатдаги яна бир картина — “Орзу учун реквием” — турли қарамликлар тўртта бош қаҳрамон ҳаётини аста-секин қандай вайрон қилишини кўрсатади.

Нашрнинг ёзишича, филм атайлаб очиқ-ойдин ишланган бўлиб, қаҳрамонларнинг қарорларини такрорлаш истагини узоқ вақтга сўндиришга қодир.