Жойларда пропан таъминотидаги узоқ кечикишлар давом этмоқда
Фарғона вилояти Бағдод тумани Қирқволди қишлоғи аҳли 18-август куни ҳамма ишини йиғиштириб, эрталабдан кечгача газбаллон келишини кутди. Уларга охирги марта суюлтирилган газ берилганига уч ойдан ошиб кетган. “Деярли 12 соатдан бери кутяпмиз. Таърифга тил ожиз-да энди. Илон Маск Марсга бир балолар қурамиз деяпти, биз эса газбаллон кутиб ўтираверамиз. Яхши бўлиб кетади, худо хоҳласа”, дейди Kun.uzъга юборилган видео муаллифи.
Фарғона вилоятида суюлтирилган газ етказиб беришдаги узоқ муддатли узилишлар давом этмоқда.
Тарқалган видеода ўнлаб қишлоқ аҳолиси пропан баллонларини узун навбатга териб қўйган ҳолда, уларни олиб келадиган юк машинасини кутаётгани акс этган. Уларга бир кун аввал "эртага газбаллон келади" деб айтилган.
"2026-йил 18-август. Шом тушиб, ой чиқди. Эрталаб соат 9 дан бери ишимизни ташлаб ўтирибмиз. Охирги марта суюлтирилган газ 12-майда келган эди. Мана, уч ойдан ошди, газбаллон йўқ. Деярли 12 соатдан бери кутамиз. Бу ҳолатни таърифлашга тил ожиз. Илон Маск Марсда бир нималар қуришни режалаштираётган бир пайтда, биз газбаллон кутиб ўтираверамиз. Худо хоҳласа, ҳаммаси яхши бўлиб кетади", – дейди мурожаатчи.
Аҳоли туман газ идорасига бориб, идора бошлиғига шикоят қилган. Бошлиқ жазирама иссиқ туфайли хавфсизлик нуқтаи назаридан соат 11:00 дан 17:00 гача газбаллонларни тўлдиришга чеклов қўйилганини айтиб, кечикишни шу билан изоҳлаган.
Қишлоқ аҳолиси бунга жавобан: "Ҳайдовчига телефон қилиб, бугун келадими ёки эртага, шуни бизга аниқ билиб беринг", – деган.
Газ идораси раҳбари эса ҳайдовчининг бугун келиши ёки келмаслигини ўзи ҳам билмаслигини, бу Олтиариқдаги қуйиш шохобчасига ва у ердаги навбатларга боғлиқлигини билдирган.
Kun.uz уч ҳафта аввал, июл ойи охирида Фарғона вилояти Қува туманида ҳам 100 кундан ошиқ вақтдан бери суюлтирилган газбаллон етказиб берилмагани ҳақида репортаж эълон қилган эди. Кўп ўтмай, аҳоли хонадонларига пропан таъминотидаги узоқ кечикишлар бутун республикага ёйилгани маълум бўлди.
Ўшанда Энергетика вазирлиги бу йўналишдаги мавжуд муаммоларни босқичма-босқич бартараф этиш ишлари олиб борилаётганини маълум қилган эди.
Маълумот учун, Фарғона вилоятидаги 509 мингта хонадоннинг эҳтиёжини қоплаш учун (ҳар бирига 20 кг дан) ойига ўртача 10,2 минг тонна суюлтирилган газ керак бўлади, аммо йил бошидан бери бирор марта ойига бунча пропан етказиб берилмаган. Январ ойида 8,5 минг тонна бўлган кўрсаткич ойдан ойга пасайиб, май ойида 4 минг тоннага, июнда эса 4,9 минг тоннага тушиб қолган. Бу эса эҳтиёжнинг ярмини ҳам қопламайди.