Жоржина Родригес Роналдунинг фарзандларини қонуний асраб олди
**Жоржина Родригес Роналду фарзандларининг қонуний онасига айланди**
Яқинда Криштиану Роналду билан турмуш қурган Жоржина Родригес энди футболчининг уч нафар тўнғич фарзанди учун ҳам қонуний она мақомини олди. Португалия нашрларининг хабар беришича, Жоржина 2010-йилда туғилган Криштиану Жуниор ҳамда 2017-йил июнида дунёга келган эгизаклар Ева Мария ва Матеони расман асраб олган.
Манбаларга кўра, Жоржина бу болаларга ҳар доим ўз фарзандларидек муносабатда бўлган. Оналик унинг учун устувор аҳамиятга эга бўлиб, у болалар тарбиясида фаол иштирок этади. Жоржина ўзининг ижтимоий тармоқлардаги саҳифаларида ҳам ўзини фахр билан "бешта фарзанднинг онаси" деб атайди.
Ушбу асраб олиш жараёни натижасида Жоржина футболчи билан мутлақо тенг ота-оналик ҳуқуқига эга бўлди. Матбуот хабарларига кўра, бу жараён "махфий асраб олиш" мақомида, барча ҳужжат ишлари оммавий ахборот воситаларидан сир сақланган ҳолда амалга оширилган.
Эслатиб ўтамиз, Роналду ва Жоржинанинг икки нафар умумий фарзанди ҳам бор. Уларнинг биринчи қизи Алана 2017-йил охирида туғилган бўлса, 2022-йилда Белла Эсмералда дунёга келган (унинг эгизак укаси туғуруқ вақтида вафот этган).
Оиладаги бу муҳим ўзгаришлар йилнинг энг кутилган тўйидан бир ҳафта ўтиб содир бўлди. Роналду ва Жоржина Португалиянинг Кашкайш ҳудудидаги 60 миллион еврога баҳоланган қасрида, фақат фарзандлари иштирокида, тор доирада турмуш қуришган эди. Тўй санаси ҳам рамзий маънога эга бўлиб, жуфтликнинг унаштирилганига роппа-роса бир йил, илк учрашувларига эса 10 йил тўлган эди.
2016-йилда улар илк бор учрашганида, Жоржина Мадриддаги Гусси дўконида оддий сотувчи бўлиб ишлаган, Роналду эса "Реал" футболчиси эди. Бугунги кунга келиб, Жоржина нафақат футболчининг рафиқаси, балки шахсий кийим брендига, ўзининг реалити-шоусига ва 80 миллионлик ижтимоий тармоқ аудиториясига эга бўлган таниқли шахсга айланган.