Жомий ва Навоий ҳақидаги ўзбек-тожик фильмининг премьераси яна қолдирилди
Жомий ва Навоий ҳақидаги ўзбек-тожик фильмининг премьераси яна қолдирилди
Ўзбекистон ва Тожикистон ҳамкорлигида суратга олинган «Юлдузлар шуъласи: Жомий ва Навоий» фильмининг премьера намойиши яна қолдирилди. Аввалроқ фильмни сентябрь ойида тақдим этиш режалаштирилган эди, бироқ энди унинг премьераси октябрь ойининг иккинчи ярмида Душанбеда бўлиб ўтиши мумкин.
«Тожикфильм» раҳбари Маҳмадсаид Шоҳиён 17 сентябрь куни картина намойиши билан боғлиқ ҳеч қандай муаммо йўқлигини, устида ишлар давом этаётганини ва сана икки давлат ўртасидаги келишувларга мувофиқ белгиланишини маълум қилди. Аниқ муддат ҳозирча айтилмаган. Эндиликда фильм октябрь ойининг иккинчи ярмида «Тожи Сомон» халқаро кинофестивалида намойиш этилиши мумкин.
Шу йилнинг март ойида Тожикистон президентининг давлат ташрифи доирасидаги маданий дастур давомида Тошкентда «Юлдузлар шуъласи» фильмидан парчалар намойиш этилган эди. Ўшанда «Тожикфильм» тўлиқ талқинни Ўзбекистон ва Тожикистон мустақиллигининг 35 йиллигига қадар тақдим этиш режалаштирилаётганини маълум қилганди.
Фильм Алишер Навоий ва Абдураҳмон Жомийга бағишланган. Суратга олиш ишлари ҳар икки давлатда бўлиб ўтган, Ўзбекистонда эса асосий эпизодлар Бухорода ва Тошкентдаги «Ўзбекфильм» павильонларида суратга олинган. Март ойида ижодкорлар постпродакшн босқичида бўлиб, фильмнинг ўзбек ва тожик тилларидаги талқинларини тайёрлашаётган эди.