Жиноятчиликка мойиллар

**Жиноятга мойиллар**

АҚШда Ўзбекистон фуқаросига штатлараро ташилаётган юк жўнатмаларини ўғирлаш мақсадида тил бириктириш айблови қўйилди. Тергов талқинига кўра, ушбу схема камида 24 партия товарларга дахлдор бўлиб, айбланувчи алоқадорлиги тахмин қилинаётган эпизодлардаги юкларнинг чакана қиймати 12 миллион доллардан ошади.

Коннектикут федерал округи прокуратурасининг хабар қилишича, айбланувчи Бриджпортдаги федерал суд олдида жавоб берди ва айбини тан олмади. У 2026 йилнинг июнь ойида Калифорния штатининг Онтарио шаҳрида ҳибсга олинганидан кейин ҳибсда қолмоқда.

Терговнинг ҳисоблашича, 2025 йилнинг сентябрь ойидан бошлаб айбланувчи ва унинг тахминий шериклари транспорт компанияларининг рўйхатдан ўтиш маълумотлари, ҳисоб рақамлари, корпоратив электрон почталари ва эгалари ҳақидаги маълумотлардан фойдаланиб, уларни сотиб олишган ёки назоратга олишган. Сўнг улар ўзларини бизнеснинг аввалги эгалари сифатида кўрсатиб, штатлараро юкларни ташиш бўйича шартномалар тузишган. Ташувчи омбордан ёки тарқатиш марказидан юкни олганидан кейин, жўнатма белгиланган манзилга етказилмаган, кейинчалик эса унинг ўғирлангани ҳақида эълон қилинган. Баъзи ҳолларда схеманинг тахминий иштирокчилари ўғирланган нарсаларни қайтариш учун товон пули талаб қилишган.

Иш материалларига кўра, ўғирланган товарлар орасида қаттиқ дисклар, аудиоускуналар, кийим-кечак, электроника, компьютер техникаси, озиқ-овқат маҳсулотлари, таркибида никотин бўлган маҳсулотлар ва бошқа товарлар бўлган.

Айблов хулосасида, шунингдек, АҚШда доимий яшовчи мақомига эга бўлган айбланувчи Нью-Джерси штатининг амалдаги тижорат ҳайдовчилик гувоҳномасига эга бўлгани айтилади. Бундан ташқари, ундан бошқа бешта номга расмийлаштирилган сохта ҳайдовчилик гувоҳномалари топблиган. Уларда айбланувчининг сурати бўлган, аммо юз тузилиши ўзгартирилган.

Федерал катта ҳакамлар ҳайъати 22 сентябрь куни айблов хулосасини тақдим этди. Тил бириктириш айблови беш йилгача озодликдан маҳрум қилиш жазосини назарда тутади.