Жиноий гуруҳ мигрантларни назорат қилиш учун паспортлардан фойдаланган
Вьетнамлик мигрантларни Буюк Британияга олиб келувчи тармоқ иши бўйича беш киши ҳукм қилинди.
**Жиноий гуруҳ мигрантларни назорат қилиш учун паспортлардан фойдаланган**
Буюк Британияга ноқонуний олиб кирилган мигрантларнинг паспортларидан «қарздорлик асорати» сифатида фойдаланган беш нафар эркак қамоқ жазосига ҳукм қилинди.
Жиноятчиликка қарши курашиш миллий агентлиги (NCA) хабарига кўра, жиноий гуруҳ Вьетнам фуқароларини мамлакатга ноқонуний олиб кирган ва 1,6 миллион фунт стерлингдан ортиқ маблағни легаллаштирган.
Терговчиларнинг таъкидлашича, гуруҳ мигрантлар Франциядан Буюк Британияга кичик қайиқлар ва юк машиналарида йўл олишидан олдин уларнинг паспортларини олиб қўйган.
NCA маълумотларига кўра, ушбу ҳужжатлардан мигрантларни назорат қилиш учун фойдаланилган, айни пайтда эса чегарани кесиб ўтиш учун тўловлар йиғилиб, Вьетнамга жўнатилган.
Терговчилар 2024 йилнинг июлидан 2025 йилнинг октябригача бўлган даврда ушбу шахслар 740 та транзакция орқали Вьетнамдаги ҳисоб рақамларига 1,65 миллион фунт стерлингдан ортиқ маблағ ўтказганини аниқладилар.
Терговга алоқадор автомобилдан 220 дан ортиқ Вьетнам паспортлари топилган.
Агентлик маълумотларига кўра, Ковентридан бўлган 31 ёшли Винь Ван Нгуен ва Куанг Ван Нгуен ушбу операцияга раҳбарлик қилган.
Ҳуқуқ-тартибот идоралари ходимлари Куангнинг тўхтаб турган автомобиль яқинида ўзини шубҳали тутаётганини пайқаб, уни 2025 йил 11 сентябрда Бирмингем марказида ҳибсга олишган.
Автомобиль кўздан кечирилганда, унинг юкхонасидан 16 700 фунт стерлингдан ортиқ нақд пул ва бир жойга боғлаб қўйилган 220 та Вьетнам паспорти, шунингдек, қўлда ёзилган қайдлар ва аввалги пул ўтказмалари квитанциялари топилган.
Тергов икки ой олдин, Шарль де Голль аэропортидаги Франция божхона ходимлари Куанг номига юборилган жўнатмани тутиб қолганидан кейин бошланган эди.
Ичида шоколад ва кийим-кечак бор деб кўрсатилган жўнатмадан 22 та Вьетнам паспорти чиққан.
Кейинги суриштирувлар Буюк Британия бўйлаб почта бўлимлари орқали амалга оширилган пул ўтказмаларини гуруҳ аъзолари билан боғлаган.
NCA мигрантларнинг паспортларидан «қарздорлик асорати» сифатида фойдаланилганини маълум қилди.
Тергов давомида мусодара қилинган телефонларнинг криминалистик таҳлили одам контрандаси йўналишлари, паспортлар ва мигрантларнинг ҳаракатланиши ҳақидаги суҳбатларни фош қилди.
Шунингдек, ходимлар мигрантларни «жўжалар» деб атаган хабарларни топишди, NCA бу жиноий гуруҳ томонидан қўлланиладиган жаргон эканини билдирди.
NCA бўлими қўмондони Сара-Жейн Мурнинг айтишича, гуруҳ фойда олиш мақсадида мигрантларни ташишда «ҳеч қандай виждон азобини» ҳис қилмаган.
Унинг сўзларига кўра, терговчилар томонидан топилган хабарлардаги иборалар жиноий гуруҳнинг ўзлари олиб кирган одамларга бўлган муносабатини кўрсатади.
Мурнинг қўшимча қилишича, кўплаб мигрантлар Буюк Британияга келганларидан кейин саёҳат билан боғлиқ қарзларини тўлашга уриниб, янада кўпроқ қийинчиликларга дуч келишган.
Тергов давомида топилган квитанциялар ходимларга жиноий гуруҳга алоқадор пул ўтказмаларини кузатишга ёрдам берди.
Ливерпуль қироллик судидаги икки ҳафталик суд жараёнидан сўнг, Винь Буюк Британияга ноқонуний киришга кўмаклашиш ва жиноий йўл билан қўлга киритилган мулкни ўтказиш бўйича тил бириктирганликда айбдор деб топилди.
34 ёшли Куанг ва Лиа-Чиен Тронг иккала айбловни ҳам олдиндан тан олишган эди, Ротеремдан бўлган 28 ёшли Си Трай Хо ва 23 ёшли Ван Хуи Нгуен эса суд бошланганидан кейин ўз айбларини тан олишга қарор қилишди.
Винь 12 йил-у олти ойга, Куанг тўққиз йил-у тўққиз ойга, Хуи етти йил-у икки ойга, муқим яшаш жойига эга бўлмаган Тронг олти йилга, шунингдек, муқим яшаш жойига эга бўлмаган Хо эса тўрт йил-у олти ойга озодликдан маҳрум этилди.