Жетоур 781 от кучига эга Травеллер 7 йўлтанламасини тақдим этди
Хитойнинг Жетоур компанияси янги Травеллер 7 йўлтанламасини намойиш қилди. У Ланд Ровер Дефендеръга хос қиёфага эга бўлди.
Жетоур 781 от кучига эга Травеллер 7 йўлтанламасини тақдим этди
Жетоур компанияси Хитойнинг Ченду шаҳрида бўлиб ўтган автосалонда ўзининг янги Травеллер 7 йўлтанламасини намойиш этди. Аутоҳоме нашрининг хабар беришича, ушбу автомобил учун ҳозирда олдиндан буюртмалар қабул қилинмоқда. Уни банд қилиш учун 777 юан (тахминан 800 минг сўм) миқдорида тўлов амалга ошириш лозим.
Автомобил дизайнининг асосий ўзига хослиги – бу ёрқин чизиқ билан бирлаштирилган думалоқ диодли кундузги чироқларга эга ноодатий олд оптикадир. Умуман олганда, моделнинг услуби автосаноатда "тўртбурчак" кузовлар трендини бошлаб берган Британиянинг Ланд Ровер Дефендер моделини эслатади.
Автомобил бўртма капот ва тўртбурчак шаклидаги массив ҳаво ютгич билан безатилган. Травеллер 7 томидаги улкан рейлинглар орасида панорамали люк жойлашган.
Қизиғи шундаки, тизер суратларда автомобилнинг юкхона эшигига "йўлтанламас" кофери ўрнатилган эди. Бироқ, "жонли" нусханинг орқа қисмида оддий захира ғилдираги кўзга ташланади.
Интерьер Т2 йўлтанламаси билан ягона консепсияда яратилган: ихчам рақамли асбоблар панели, ҳаракатланиш режимларини ўзгартириш учун мўлжалланган шайба, симсиз қувватлаш мосламаси, орқа кўриниш камераси ва катта мултимедиа-кўнгилочар тизими экрани мавжуд. Шуни таъкидлаш жоизки, салонда анча-мунча жисмоний тугмалар ва "эски услубдаги" созлагичлар сақланиб қолган.
Модел Хитойда икки литрли бензин двигатели билан сотувга чиқарилади. Агрегат саккиз поғонали "автомат" узатмалар қутиси билан биргаликда ишлайди. Уланма – тўлиқ. Шунингдек, таркибида 1,5 литрли двигател ва учта электромотор бўлган, қуввати 781 от кучига тенг гибрид версияси ҳам мавжуд. Умумий юриш масофаси – 1,4 минг км.