Жарқўрғонда ўқувчига номақбул муносабат: техникумнинг уч ходими ишдан олинди
Сурхондарё вилояти Жарқўрғон туманидаги 2-сон техникумда ўқувчига нисбатан номақбул хатти-ҳаракат содир этилгани юзасидан уч ходим ишдан олинди, яна уч ходимга ҳайфсан берилди. Бу ҳақда Касбий таълим агентлиги расмий муносабат билдирди.
Жарқўрғонда ўқувчига нисбатан номақбул муносабат: техникумнинг уч нафар ходими ишдан бўшатилди
Агентлик берган маълумотга кўра, ўқувчининг отаси 30-сентабр куни ички ишлар органларига мурожаат қилган. Ўтказилган суриштирувдан сўнг ҳолатга ҳуқуқий баҳо берилиб, суд муҳокамасидан кейин тегишли жазо чораси қўлланган.
Ҳолат маълум бўлгач, техникумда хизмат текшируви ўтказилган. Унда воқеанинг юзага келиш сабаблари ҳамда масъул ходимларнинг ўз вазифаларини қай даражада бажаргани ўрганилган.
Текширув якунига кўра, хизмат вазифаларини бажаришда йўл қўйган камчиликлари учун техникумнинг ёшлар билан ишлаш бўйича директор ўринбосари ва психологи лавозимидан озод этилган.
Ўқувчига нисбатан номақбул хатти-ҳаракат содир этган ишлаб чиқариш таълими устаси билан тузилган меҳнат шартномаси бир томонлама бекор қилинган.
Шунингдек, ўқув ишлари бўйича директор ўринбосари, ишлаб чиқариш таълими бўйича директор ўринбосари ва физика фани ўқитувчисига ҳайфсан интизомий жазоси берилган.
Агентлик барча ҳудудларда ички ишлар органлари билан ҳамкорликда ўқувчиларнинг ҳуқуқ ва манфаатларини ҳимоя қилиш, ҳуқуқбузарликларнинг олдини олиш ҳамда таълим муассасаларида хавфсиз муҳитни таъминлашга қаратилган профилактик тадбирлар ўтказилаётганини билдирган.
«Ҳар бир ўқувчи таълим муассасасида ўзини хавфсиз ва ҳимояланган ҳис қилиши керак», - дейилади муносабатда.
Агентлик бундай ҳолатларнинг такрорланишига йўл қўймаслик учун назорат ва профилактика механизмлари ишлаб чиқилиши, ўқувчилар мурожаатларини ўз вақтида ўрганиш бўйича раҳбар ва ходимларнинг жавобгарлиги кучайтирилишини маълум қилган.