Жанубий кореялик тадбиркор Наманганда лойиҳаларни режалаштирмоқда

Жанубий кореялик тадбиркор Наманганда лойиҳаларни режалаштирмоқда

Жанубий Кореянинг У&К Глобал Нетворк, ЭсоФарм Глобал ва Баеклим Девелопмент компаниялари директорлар кенгаши раиси Лим Санг Хва янги инвестиция лойиҳаларини муҳокама қилиш учун Наманган вилоятига келди. Бу ҳақда Наманган вилояти ҳокимлиги ахборот хизмати маълум қилди.

Ташриф давомида тадбиркор Наманган вилояти ҳокими Шавкатжон Абдураззаков билан учрашди. Учрашувда Чуст ва Мингбулоқ туманларида балиқчилик ҳамда қурилиш йўналишларида амалга оширилиши режалаштирилаётган лойиҳалар кўриб чиқилди.

Чуст туманида Лим Санг Хва балиқ учун озуқа ишлаб чиқариш, шунингдек, замонавий кўп қаватли турар жой мажмуаларини барпо этишга сармоя киритмоқчи.

Мингбулоқ туманида эса “ақлли” балиқчилик технологияларидан фойдаланган ҳолда инновацион балиқчилик хўжалигини ташкил этиш масаласи муҳокама қилинмоқда. Бундан ташқари, инвестор балиқни қайта ишлаш лойиҳасини ҳам амалга оширишни режалаштирмоқда.

Лим Санг Хва 20 йилдан ортиқ вақт давомида профессионал фаолият билан шуғулланиб келади ва қишлоқ хўжалиги, кўчмас мулкни ривожлантириш ҳамда халқаро савдо соҳаларида лойиҳаларни амалга оширган. 2025 йилдан буён у Жанубий Корея ва Ўзбекистон ўртасидаги иқтисодий ҳамкорликни кенгайтиришда иштирок этиб келмоқда.

Учрашув якунида томонлар таклиф этилган инвестиция лойиҳаларини муҳокама қилиб, ҳамкорликни давом эттиришга келишиб олдилар.