Жанубий Корея Украинадаги элчисини чақириб олди
Украина президенти Владимир Зеленский шимолий кореялик икки асир Сеулга берилганини ошкор қилгач, дипломатик можаро чиқди. Жанубий Корея сирни очмаслик келишувини бузган Киевдан расмий тушунтириш ва узр талаб қилиб, ўз элчисини чақириб олди. Мулоқотлар давом этмоқда.
Жанубий Корея Украинадаги элчисини чақириб олди
Жанубий Корея Киевнинг икки нафар шимолий кореялик ҳарбий асирни Сеулга топширгани ҳақидаги маълумотни ошкор қилгани ортидан юзага келган дипломатик можаро сабаб Украинадаги элчиси Пак Ки Чанни чақириб олди.
“Жанубий Корея ҳукумати Украина президенти Владимир Зеленский яқинда икки нафар шимолий кореялик аскарнинг Сеулга топширилгани тўғрисидаги маълумотни оммага эълон қилгани муносабати билан расмий тушунтириш ва узр сўрашни талаб қилмоқда”, — дейилади баёнотда.
Бу қарор президент Ли Чже Мён “Агар Украина ҳукумати фактларни тан олишдан ва узр сўрашдан бош тортишда давом эца, биз қўшимча чоралар кўрамиз”, деган баёнотидан олти кун ўтиб қабул қилинди.
Шунингдек, Сеул Президент офисидан ушбу масалани сир сақлаш бўйича келишув бўлмагани ҳақидаги баёнотни рад этишни талаб қилмоқда. Хабарда қайд этилишича, ташқи ишлар вазири Чо Хён украиналик ҳамкасби Андрей Сибигадан узр қабул қилган, бироқ “бу узр Сеул кутган даражада бўлмаган”.
Шу сабаб ҳукумат Украинадаги элчисини чақириб олишга қарор қилди. Бироқ Жанубий Корея расмийлари икки мамлакат ўртасидаги муносабатлардаги муаммолар ҳал бўлишига умид билдирмоқда ва Украина томони билан маслаҳатлашувларни давом эттирмоқда.
2025-йил январ ойида Украина Қуролли кучлари Россиянинг Курск вилоятида икки нафар шимолий кореялик аскарни асирга олган. Улар Пхенян 2024-йилда Россия-Украина урушига кирганидан бери тирик қўлга олинган илк шимолий кореялик ҳарбийлар бўлган.
Яқинда Украина президенти Владимир Зеленский БМТ Бош ассамблеясида Украина асирга олинган икки нафар шимолий кореялик аскарни Жанубий Кореяга топширганини маълум қилганди.
Улардан бири асирга тушгач, ўз жонига қасд қилишга уринган.
“Шимолда одамларни ана шундай тарбиялашади. Бу — ҳақиқат. Улар одамларнинг эркинлигини тортиб олишади. Танлаш ҳуқуқини йўққа чиқариб, уларнинг онгига ўлишлари кераклигини сингдиришади”, — дея таъкидлаганди у.
Шундан сўнг Сеул норозилик билдириб, томонлар ушбу фактни ошкор этмасликка келишиб олганини таъкидлаган.