Жанубий Африканинг юқори лавозимли полициячиси жинсий жиноятларда айбланди
Ҳеч қандай изоҳ бермаган Шадрак Сибия 16 ёшли ўсмирни жинсий алоқага тайёрлаганликда ва 18 ёшли қизни зўрлаганликда айбланмоқда.
Жанубий Африканинг энг юқори мартабали полиция мулозимларидан бири Йоханнесбургдан шимоли-ғарбда жойлашган суддаги қисқа муддатли маҳкамадан сўнг жинсий жиноятларда айбланди.
Лейтенант-генерал Шадрак Сибияга қўйилаётган айбловлар орасида 16 ёшли қизни жинсий алоқага ундаш (груминг) ва 18 ёшли аёлни зўрлаш ҳолатлари бор. У шунингдек, одам савдоси айбловига ҳам дуч келмоқда, бу эса мазкур иш доирасида бошқа шахслар ҳам ҳибсга олиниши мумкинлигини англатади.
Душанба куни ҳибсга олинган ва вазифасидан вақтинча четлатилган полиция комиссари ўринбосари ҳозирча ҳеч қандай изоҳ бермади.
59 ёшли мулозим гаров эвазига озод қилиш тўғрисидаги аризани кўриб чиқиш учун 29 сентябрь куни судга қайтиши белгиланган. Прокурорлар гаров эвазига қўйиб юборишга қарши чиқиши кутилмоқда.
Миллий телерадиокомпания – SABC хабарига кўра, қочиш режаси эҳтимоли ҳақидаги маълумотлардан сўнг, давлат суддан Сибия вақтинча сақланадиган қамоқхонани ўзгартиришни ҳам сўраган.
Ушбу иш полиция хизмати коррупция ва жиноятчилар билан тил бириктириш айбловлари бўйича йирик жамоатчилик суриштируви остида бўлган бир пайтда юз бермоқда.
Ўтган йилнинг сентябрь ойида бошланган ва «Мадланга комиссияси» деб номланган суриштирув жараёнида Сибия полиция шартномаси эвазига жиноий гуруҳнинг эҳтимолий раҳбаридан совға сифатида 20 бош импала (кийик тури) олгани ҳақидаги даъволар тингланган эди.
У ушбу айбловни рад этган.