Жанубий Африкадаги уйда содир бўлган оммавий отишмада 11 киши ҳалок бўлди
Ҳалок бўлганлардан бири ҳомиладор аёл бўлгани тахмин қилинмоқда, деб хабар берди полиция.
Жанубий Африкадаги уйда содир бўлган оммавий отишмада 11 киши ҳалок бўлди
Жанубий Африка қотиллик даражаси бўйича дунёда энг юқори кўрсаткичлардан бирига эга
Жанубий Африканинг Дурбан шаҳри яқинидаги турар жой биносида содир бўлган оммавий отишмада камида 11 киши ҳалок бўлди.
Сешанба куни кечқурун қуролланган шахслар КваМахута шаҳарчасидаги уйга бостириб кириб, 14 кишига қарата ўт очган. Полициянинг маълум қилишича, 10 киши воқеа жойида ҳалок бўлган, тўрт киши шифохонага ётқизилган ва улардан бири кейинчалик олган жароҳатлари туфайли вафот этган.
Полициянинг билдиришича, қурбонларнинг айримлари ноқонуний фаолиятга алоқадорликда гумонланиб кузатув остида бўлган, бироқ бу маълумотларни «бошланган тергов ҳаракатларини ҳимоя қилиш мақсадида ҳозирча ошкор қила олмасликларини» қўшимча қилди.
Гарчи қотиллик сабаблари ҳали тасдиқланмаган бўлса-да, полиция «рақиб гуруҳлар ўртасидаги адоват» эҳтимолини истисно эта олмаслигини айтди.
«Ушбу босқичда мавжуд бўлган маълумотларга кўра, 13 эркак ва ҳомиладор экани тахмин қилинаётган бир аёл уй ичида базм ўтказаётган бўлган, шу пайт уч нафар эркак келиб, уларга қарата ўт очган», дейилади полиция баёнотида. Ҳалок бўлганлар орасида ўша аёл ҳам бор.
Воқеа жойида бўлган eNCA телеканалининг маҳаллий мухбири қуролланган шахслар қочиб кетишдан олдин қурбонлардан бирига тегишли бўлган машинага ўт қўйиб юборганини хабар қилди, видеокадрларда ёниб кетган автомобиль акс этган.
Жанубий Африка қотиллик даражаси бўйича дунёда энг юқори кўрсаткичлардан бирига эга бўлиб, полиция маълумотларига кўра, бу кўрсаткич кунига 60 дан ортиқ ўлимга тўғри келади.
Сўнгги ҳафталарда камида тўққиз нафар ўлдирилган аёлнинг даҳшатли тарзда топилиши ва жасадларнинг баъзилари йўл четига ташлаб кетилгани мамлакатда хавотирларни кучайтирди.
Ўтган йили Йоханнесбургдаги тавернада содир бўлган оммавий отишмада тўққиз киши ҳалок бўлган эди.