Жанубий Африкада топилган тўққиз аёл жасадидан бири бўйича уч киши ҳибсга олинди
Жабулиле Нтимбанинг жасади яқинда Йоҳаннесбургдан шарқдаги ҳудудда топилган тўққизинчи жасад бўлди.
Жанубий Африкада топилган тўққиз нафар аёл жасадидан бири билан боғлиқ ҳолат юзасидан уч киши ҳибсга олинди.
Жабулиле Нтимбанинг жасади ўтган пайшанба куни йўл четидан топилган эди.
Жанубий Африка полицияси Йоҳаннесбургдан шарқда жойлашган ҳудудда аёл кишининг ўлдирилиши бўйича уч нафар гумонланувчини ҳибсга олди. Бу мамлакатда аёлларга нисбатан зўравонликка эътибор қаратган ушбу минтақадаги сўнгги тўққизта ҳолатдан биридир.
Қурбонларнинг жасадлари йўл четида қолдириб кетилган бир қатор қотилликларни фош этиш босими остида қолган полиция уч нафар гумонланувчи — бир эркак ва икки аёлнинг ҳибсга олинишини «муҳим бурилиш» деб атади.
Тўққизта ҳолатнинг барчаси ҳақида гапирар экан, полиция бошлиғи вазифасини бажарувчи лейтенант-генерал Пуленг Димпане унинг ходимлари «айбдорларни жавобгарликка тортиш учун тинимсиз меҳнат қилаётганини» айтди.
Уч нафар гумонланувчи душанба куни эрталаб суд олдида жавоб бериши кутилмоқда.
Уларнинг иши ўтган пайшанба куни Дон Паркда чойшабга ўралган ҳолда ярим яланғоч жасади топилган Жабулиле Нтимбанинг ўлимига тегишли.
Сўнгги қурбонларнинг бир нечаси ярим кийинган ва жароҳатланган ҳолда топилган, бироқ полиция ушбу ўлимлар ўзаро боғлиқлиги ёки бу ерда серияли қотил иштирок этгани ҳали аниқланмаганини маълум қилди.