Жанубий Африкада 50 кишидан иборат оломон чет элликни калтаклаб ўлдирди
Шахси аниқланмаган жабрланувчига қилинган ҳужум Жанубий Африкада шу йилда бўлиб ўтган мигрантларга қарши норозилик намойишлари тўлқинидан кейин юз берди.
Жанубий Африкада 50 кишидан иборат тода чет элликни калтаклаб ўлдирди
Жанубий Африканинг Дурбан шаҳрида 50 га яқин кишидан иборат тода чет эл фуқаросини калтаклаб ўлдирди, деб хабар берди полиция.
Полициянинг билдиришича, ёши 30 ларнинг охири ёки 40 ларнинг бошида деб тахмин қилинган шахси аниқланмаган эркакка дастлаб йўл четида икки киши яқинлашган, шундан сўнг каттароқ гуруҳ унга ҳужум қилган. У воқеа жойида вафот этгани маълум қилинган.
Полиция қотиллик юзасидан тергов бошлади, жиноят мотиви ҳозирча аниқланмаган.
Ушбу қотиллик Жанубий Африкада шу йилда юз берган, баъзилари зўравонликка айланиб кетган муҳожирларга қарши норозилик намойишлари тўлқинидан кейин содир бўлди. Шу ой бошида Дурбанда ва Йоханнесбург яқинидаги Соуэтода дўконлар ва машиналарга ўт қўйилган эди.
Вилоят полицияси матбуот котиби Роберт Нетшиунда BBCʼга Дурбандаги қотиллик мотиви ҳақида тахмин қила олмасликларини ва батафсил маълумотлар тасдиқлангач эълон қилинишини айтди.
Ҳукумат намойишчиларни тинчликни сақлашга чақирди, шу билан бирга миграция ислоҳотларига эҳтиёж борлигини тан олди. Унинг маълум қилишича, шу йил бошида ноқонуний миграцияга қарши кураш бошланганидан бери ўн минглаб чет эл фуқаролари мамлакатдан чиқариб юборилган ёки ватанига қайтарилган.
Норозилик намойишларини ташкил этаётган гуруҳлардан бири — «March and March» дастлаб ҳамма ҳужжатсиз муҳожирларга Жанубий Африкани тарк этиш учун 30 июнгача муҳлат қўйган эди.
Ушбу муҳлатгача бир қатор норозилик намойишлари ўтказилди ва бошқа Африка мамлакатларидан келган одамларга ҳужумлар қилингани ҳақида хабарлар тушди.
Ушбу ҳодисалар зўравонлик кучайишидан хавотирга тушган бир қанча мамлакатларни, жумладан Зимбабве, Нигерия ва Ганани ўз фуқароларини ватанига қайтаришга ундади.
Нигерия Жанубий Африка расмийларини ўша ойда ўз фуқароларидан икки кишининг ўлимида айбдор деб топди.
Гана ҳам чет эл фуқароларига қарши намойишлар пайтида Кейптаунда отиб ўлдирилган, уч фарзанднинг отаси Баширу Исак исмли фуқаросининг ўлимини тасдиқлади.
Унинг ўлими Жанубий Африка билан дипломатик низога сабаб бўлди, ушбу мамлакат зўравонлик кўлами ошириб кўрсатилганини билдирди.
«March and March» ҳаракати етакчиларидан бири Жасинта Нгобесе-Зума ксенофобияни инкор этди.
«Биз бу одамлар билан шунча йиллар давомида бирга яшай олмаймиз ва энди бу жуда ошириб юборилди, етар дейилганда, бизга ксенофобсиз дейишмоқда», — деди у BBCʼнинг «Focus on Africa» дастурига.
Жанубий Африка деярли йигирма йилдан бери ксенофобик ҳужумларга дуч келмоқда. 2008 йилда чет эл фуқароларига қарши кенг кўламли ҳужумлар пайтида 60 дан ортиқ киши ўлдирилган ва ўн минглаб одамлар ўз уйларини тарк этишга мажбур бўлган эди.
Охирги тартибсизликлар кенг тарқалган қашшоқлик, чуқур тенгсизлик ва ишчи кучининг такмилан учдан бирига таъсир қиладиган ишсизлик фонида юз бермоқда.
Мигрантлар кўпинча иш ўринларини тортиб олишда, жиноятчиликни авж олдиришда ва давлат хизматларига босим ўтказишда айбланади, гарчи тадқиқотчилар бундай кенг қамровли даъволар далиллар билан тасдиқланмаганини айтишади.
Иқтисодий муаммоларига қарамай, Жанубий Африка иш, хавфсизлик ва яхшироқ имкониятлар излаётган мигрантлар учун қитъадаги асосий йўналишлардан бири бўлиб қолмоқда.