Жанни Инфантино: “Бадавлат федерациялар бошқаларнинг ривожланишини истамаяпти”
Жанни Инфантино: "Бой федерациялар бошқаларнинг ривожланишини истамаяпти"
ФИФА президенти Жанни Инфантино ташкилотнинг асосий вазифаси бой ва молиявий имконияти чекланган федерациялар ўртасидаги тафовутни бартараф этиш эканлигини таъкидлади.
Сўнгги пайтларда Инфантино жиддий босим остида қолмоқда. Бунга унинг ФИФА тижорат ҳуқуқларининг 20 фоизини хусусий инвесторларга сотиш орқали 4,2 миллиард доллар ишлаб топиш режаси амалга ошмай қолгани сабаб бўлган. Агар ушбу келишув амалга ошганида, ҳар бир федерацияга 40 миллион доллардан маблағ тегиши мумкин эди.
23-август, якшанба куни Доминикан Республикасида Кариб ҳавзаси футбол иттифоқи вакиллари билан учрашган ФИФА раҳбари ўз мақсадлари ҳақида шундай деди:
"Бизнинг ишимиз — 211 та аъзо мамлакатнинг ҳар бирида футболни ривожлантириш. Афсуски, баъзи йирик федерациялар бунга муҳтож эмас ва бошқаларнинг ўсишини ҳам хоҳламайди. Аммо биз етакчи давлатлар ва қолганлар ўртасидаги бу фарқни қисқартиришимиз шарт. Бошқалар учун ҳам сармоя ва имкониятлар эшигини очишимиз керак".
Келаси йили ФИФА президентлиги учун сайловлар ўтказилади. Бироқ Реутерс нашри берган маълумотга кўра, УЕФА, ОФК ва КОНКАКАФ Инфантинони қўллаб-қувватлашдан бош тортиши мумкин. Айни пайтда ташкилотлар ичида шу масала муҳокама қилинмоқда.
Қизиқ жиҳати шундаки, КОНКАКАФ президенти Виктор Монталяни Инфантинодан Доминикандаги ўсмирлар (У-14) турнирига келмасликни сўраган эди. ФИФА раҳбарига нисбатан эътирозлар кучайиб бораётгани сабабли унинг ташрифи мусобақа нуфузига салбий таъсир қилиши айтилган. Шунга қарамай, турнирга борган Инфантино ўзини жуда илиқ кутиб олишганини маълум қилди.