Жаҳонгир Ортиқхўжаев “Пахтакор”дан нега кетди?

Жаҳонгир Ортиқхўжаевнинг "Пахтакор" футбол клуби билан ҳамкорлиги якунланди. Тошкентнинг собиқ ҳокими ва тадбиркор Ортиқхўжаевнинг клубдан кетиши ҳақидаги қарор 24-август куни жамоа аъзоларига маълум қилинган. Бу ҳақда футбол мутахассиси Алишер Никимбоев клуб ходимларига таяниб хабар берди.

Манбанинг таъкидлашича, Ортиқхўжаевнинг клубдан кетиши кутилган бўлса-да, бу жараённинг бунчалик тез содир бўлишини ҳеч ким кутмаган эди.

Ҳозирда клубнинг келажаги ноаниқ бўлиб қолмоқда. Жамоанинг Элит Чемпионлар лигасидаги илк ўйини 14-сентябр куни Саудия Арабистонида "Ал-Аҳли"га қарши бўлиб ўтади ва унга атиги уч ҳафтага яқин вақт қолди.

Расмий баёнот берилмаган бўлса-да, ОАВ ва мутахассислар Жаҳонгир Ортиқхўжаевнинг "Пахтакор" билан ҳамкорликни тўхтатишига "Сурхон"га қарши ўйиндаги ҳакамлик қарорлари сабаб бўлган бўлиши мумкинлигини тахмин қилишмоқда. Клубнинг асосий эътирози учрашувнинг 90+3-дақиқасида Ҳожимат Эркинов томонидан киритилган голнинг ҳакамлар томонидан инобатга олинмагани билан боғлиқ.

Маълумот учун, Ўзбекистон чемпионатининг 18-туридан сўнг "Пахтакор" 39 очко билан 3-ўринни эгаллаб турибди. Жамоа навбатдаги ўйинини 25-август, сешанба куни Самарқанднинг "Динамо" клубига қарши ўтказади.