ITOCHU ва Deutsche Bank Ўзбекистон Хорижий инвесторлар кенгашига кирди
Узбекистон Президенти ҳузуридаги Хорижий инвесторлар кенгаши Япониянинг ITOCHU компанияси ва Deutsche Bank ҳисобидан ўз таркибини кенгайтирди ҳамда 2027 йил охиригача мўлжалланган иш режасини тасдиқлади.
ITOCHU ва Deutsche Bank Ўзбекистон Хорижий инвесторлар кенгаши таркибига кирди
Япониянинг ITOCHU корпорацияси ва Deutsche Bank AG Ўзбекистон Президенти ҳузуридаги Хорижий инвесторлар кенгашининг аъзоларига айланди.
Янги иштирокчиларни аъзоликка қабул қилиш тўғрисидаги қарор 4 ноябрь куни Инвестициялар, саноат ва савдо вазири Лазиз Қудратов раислигида ўтказилган Кенгаш Ижроия қўмитасининг йиғилишида қабул қилинди.
Йиғилиш Инвестициялар, саноат ва савдо вазирлиги биносида бўлиб ўтди. Унда, шунингдек, Европа тикланиш ва тараққиёт банкнинг Ўзбекистондаги ваколатхонаси раҳбари Анди Аранитаси, Осиё тараққиёт банки ваколатхонаси директори Канокпан Лао-Арайя, Халқаро молия корпорациясининг минтақавий раҳбари Нил Маккейн ва Кенгаш Котибияти раҳбари Азиз Ғафуров иштирок этди.
Иштирокчилар Котибиятнинг 2026 йилнинг дастлабки ўн ойидаги фаолияти бўйича ҳисоботини муҳокама қилдилар. Хусусан, гап ўнта идоралараро гуруҳнинг фаолияти, инвесторлар ташаббусларини илгари суриш, Марказий Осиё ва Кавказ инвестиция кенгашларининг Минтақавий альянсини (RAIC-CAC) ташкил этиш ҳамда бизнес-ассоциациялар билан ҳамкорлик қилиш ҳақида борди.
Ҳозирда Кенгаш 15 дан ортиқ мамлакатдан 40 дан зиёд компания ва молия институтларини бирлаштиради.
Йиғилишда, шунингдек, 2027 йил охиригача бўлган иш режаси тасдиқланди. Унда 70 га яқин ишчи гуруҳ йиғилишларини, 2026 йил 25 ноябрь, 2027 йил 18 май ва 23 ноябрда Кенгашнинг оралиқ сессияларини, шунингдек, 2027 йил 14–16 июнь кунлари бешинчи ялпи сессияни ўтказиш кўзда тутилган.
Бундан ташқари, RAIC-CAC йиғилиши 2027 йил 9 апрелга Тошкентда режалаштирилган бўлиб, келаси йил бошида Investment Outlook тақдимоти кутилмоқда.
Кенгашнинг 2026 йил учун йиллик ҳисоботи 16 декабрь куни FIC Year-end Session тадбирида тақдим этилади.
Ҳужжатга вазирлик томонидан ўтказилаётган хорижий инвестицияларнинг Ўзбекистон иқтисодиётига таъсири тўғрисидаги 1 000 дан ортиқ респондентлар ўртасидаги умуммиллий сўровнома якунларини киритиш режалаштирилган.