Италия бош вазири мактабларда бурқа ва ниқобни тақиқламоқчи

Италия бош вазири мактабларда бурқа ва ниқобни тақиқлашни режалаштирмоқда

Италия мактабларда бурқа ва ниқобни тақиқлайди ҳамда синфларда чет эллик ўқувчилар сонига чеклов жорий этади. Бу ҳақда мамлакат бош вазири Жоржа Мелони маълум қилди.

Мелони бу борадаги режани ўзининг “Италия биродарлари” (ФдИ) партиясининг ёшлар қаноти йиғилишида баён этди. У “мактаб тизимига интеграция қилишда жиддий қийинчиликларга дуч келаётган” чет эллик ўқувчиларнинг ота-оналари учун италян тили дарслари мажбурий бўлишини айтди.

“Биз учун Италияга келган ва бу ерда ўз келажагини қурмоқчи бўлган ҳар бир киши тилимизни ўрганиши, маданиятимизни тушуниши ва қоидаларимизни ҳурмат қилиши керак”, деди Мелони.

Ҳукумат режани маъқуллагач, ўзгаришлар қонунга айланиши учун улар 60 кун ичида парламент томонидан тасдиқланиши керак.

Бурқада кўзлар билан бирга юз тўлиқ ёпилади, ниқобда эса кўзлар очиқ қолади. Италияда иккаласига ҳам бевосита тақиқ қўйилмаган. Бироқ 1975-йилда қабул қилинган қонун шахсни аниқлашни қийинлаштирадиган кийимлардан фойдаланишни ман этади.

2008-йилдаги суд қарорида эса юзни тўлиқ ёпадиган кийимларга диний ёки маданий сабабларга кўра рухсат берилиши, бироқ шахсни тасдиқлаш талаб этилганда юз очилиши кераклиги аниқлаштирилган. Бурқа тақиқи билан бирга, Мелони ҳар бир синфдаги хорижлик ўқувчилар сонига қонуний чеклов ҳам жорий этишини айтди.

Шу билан бирга, Италия қонунчилигида ҳар бир синф ва мактабдаги хорижлик ўқувчилар улуши учун аллақачон 30 фоизлик чеклов мавжуд. Мелони ушбу тартиб қандай ўзгаришини аниқ тушунтирмади. Ҳозирда Италия мактабларидаги ўқувчиларнинг қарийб 12 фоизини хорижликлар ташкил этади.