Истанбулда кучли сув тошқинлари: Ўзбекистон консулхонаси огоҳлантириш эълон қилди
Кучли ёмғир, шамол ва ноқулай об-ҳаво тошқин, йўлларда ҳаракатланишнинг қийинлашиши ҳамда бошқа фавқулодда ҳолатлар хавфини
Истанбулда кучли сув тошқинлари: Ўзбекистон консулхонаси огоҳлантириш берди
Истанбул, Ялова ва Кожаели вилоятларида яшаётган ҳамда вақтинча бўлиб турган ўзбекистонлик фуқаролар об-ҳаво кескин ёмонлашгани сабабли ҳушёр бўлишга чақирилди. Бу ҳақда Ўзбекистоннинг Истанбулдаги бош консулхонаси маълум қилди.
Кучли ёмғир, шамол ва ноқулай об-ҳаво шароитлари сув тошқинлари, йўлларда ҳаракатланишнинг қийинлашиши ҳамда бошқа фавқулодда ҳолатлар хавфини келтириб чиқариши мумкин.
Шу сабаб ватандошларимиздан қуйидаги эҳтиёт чораларига амал қилиш сўралади:
- Зарурат бўлмаса, узоқ масофаларга сафарга чиқмаслик;
- Кучли ёғингарчилик пайтида сув тўпланиши мумкин бўлган пастқам жойлар, ерости йўллари ва туннеллардан узоқ туриш;
- Денгиз соҳиллари, дарахтлар, электр узатиш тармоқлари ва мустаҳкам ўрнатилмаган конструксиялар ёнида эҳтиёткорликни кучайтириш;
- Автомобил бошқаришда тезликни пасайтириш ва хавфсиз масофани сақлаш;
- Туркиянинг ваколатли идоралари томонидан эълон қилинаётган расмий огоҳлантириш ва тавсияларга қатъий риоя қилиш.
15-октябрга ўтар кечаси Истанбулда кучли ёғингарчиликлар оқибатида ер ости йўлаклари ҳамда турар-жой биноларини сув босди. Хавфли вазият сабаб Истанбулдаги барча таълим муассасаларида дарслар бекор қилинди.