Исроилда “НАЗА” филми режиссёрларини фуқароликдан маҳрум этиш талаб қилинди
Исроилда “НАЗА” филми режиссёрларини фуқароликдан маҳрум этиш талаб қилинди
Исроил маданият вазири Мики Зоҳар Исроил армиясини танқид қилган “НАЗА” ҳужжатли филми режиссёрлари Рейчел Шор ва Ювал Абраҳамни фуқароликдан маҳрум қилишни талаб қилди. Улар Исроил ва Буюк Британия фуқаролари ҳисобланади.
“Дунё бўйлаб антисемитларнинг қарсакларига эришиш учун ўз мамлакатига зарар етказишга тайёр бўлган бу режиссёрларнинг ўз-ўзига бўлган нафратини тасаввур қилиб бўлмайди. Бу давлатга нисбатан хиёнатдир”, деб ёзди Зоҳар 13-сентябр куни Х платформасида.
У ҳар икки режиссёрнинг Исроил фуқаролигини “хиёнат учун” бекор қилиш бўйича зудлик билан чоралар кўришини айтди. Дпа агентлигининг қайд этишича, Зоҳарнинг бу таҳдиди амалга ошиш-ошмаслиги ҳозирча номаълум.
Феврал ойида Исроил расмийлари илк марта судланган икки жиноятчини фуқароликдан маҳрум қилди ва уларни мамлакатдан чиқариб юбориш ҳақида қарор чиқарди. Тегишли қонун террорчилик ҳужумларини содир этган ва Фаластин Миллий маъмуриятидан молиявий ёрдам олган шахсларга нисбатан қўлланади.
Исроил миллий хавфсизлик вазири, ўта ўнгчи сиёсатчи Итамар Бен-Гвир ҳам режиссёрларни кескин танқид қилиб, уларни бутун Исроил халқи учун уят деб атади.
“Ишончим комилки, сизнинг дўстларингиз — ҲАМАСдаги душманларимиз сизни қучоқ очиб кутиб олади!”, деб ёзди у ўзининг Хъдаги саҳифасида.
12-сентябр куни Абраҳам ва Шорнинг “НАЗА” ҳужжатли филми 83-Венеция халқаро кинофестивалида ҳакамлар ҳайъатининг махсус мукофотини қўлга киритди. Премьера вақтида филм 25 дақиқа давомида тик туриб олқишланди. Филм Европа Иттифоқи ва АҚШда террорчи ташкилот деб тан олинган ҲАМАС ҳаракати томонидан 2023-йил 7-октябрда Исроилга қилинган йирик ҳужум билан бошланади.
Филмда Исроил ҳарбийларининг уруш олиб бориш усуллари танқид қилинади. Абраҳам Исроил разведкасининг 24 нафар офицеридан интервю олган. Уларнинг овозлари рақамли равишда ўзгартирилган, юзлари эса яширилган. Улар Ғазо секторида нишонлар қандай танланиши ва тинч аҳоли орасида қанча талафот бўлиши мақбул деб ҳисобланиши ҳақида гапирган.
Исроил мудофаа кучлари (САХАЛ) филмдаги айбловларни рад этди. Армия филмни шахси номаълум бўлган шахсларнинг аноним баёнотларига асослангани учун танқид қилди.
2023-йил 7-октябрда ҲАМАС ҳаракати Исроилга йирик ҳужум бошлади. Жангари гуруҳ Исроилга ракета зарбалари берди, унинг ҳудудига бостириб кирди ва замонавий Исроил давлати тарихидаги энг йирик тинч аҳоли қирғинини амалга оширди.
Оқибатда тахминан 1200 киши ҳалок бўлди. Жангарилар, шунингдек, 250 га яқин одамни гаровга олиб, Ғазо секторига олиб кетди. Гаровга олинганларнинг бир қисми кейинчалик алмаштирилди ёки озод қилинди, бир қисми эса ҳалок бўлди.
Бунга жавобан Исроил ҲАМАСга қарши уруш эълон қилди. ҲАМАС назоратидаги Соғлиқни сақлаш вазирлиги маълумотларига кўра, Ғазо секторидаги қуруқликдаги операция ва бомбардимонлар давомида 73 мингдан ортиқ фаластинлик ҳалок бўлган, 174 мингдан ортиқ киши яраланган.