Исроил сулҳга қарамай Ғазодаги назорат ҳудудини кенгайтиришда давом этяпти
Исроил ва Ҳамас ўртасидаги оташкесим келишуви қоғозда қарийб бир йилдан бери амалда. Аммо Исроил Ғазодаги назорат ҳудудини кенгайтириб, яқин орада бу ерлардан чиқиб кетиш нияти йўқлигини айтяпти.
Исроил сулҳга қарамай Ғазодаги назорат ҳудудини кенгайтиришда давом этяпти
Нев Ёрк Тимес ўрганган сунъий йўлдош тасвирларига кўра, сулҳдан кейин Исроил қўшинлари ўз мавқеларини мустаҳкамлаган ва камида 12 та ҳарбий пост барпо этган. Улар келишилган чекиниш чизиғидан ҳам ўтиб, сектор ичкарисига янада чуқурроқ кирган.
АҚШ қўллаб-қувватлаган сулҳ 2025-йил октабрда кучга кирган эди. Унга биноан, Фаластин анклави — Ғазо секторининг қарийб ярми Исроил назоратида қолган. Бироқ жорий йил май ойида Исроил бош вазири Бинямин Нетаняҳу Исроил армияси ҳудуднинг тахминан 60 фоизини назорат қилаётганини айтди. У бундан ҳам каттароқ қисмини эгаллаш режаси борлигини ҳам очиқ билдирган.
Таҳлилчилар, дипломатлар ва Ғазо аҳолиси фикрича, Исроилнинг сулҳдан кейинги ҳаракатлари ҳудуднинг бўлинишини янада мустаҳкамлаб қўяётганга ўхшайди. Аслида сулҳ Ғазони вақтинча икки қисмга ажратган эди. Ҳозир эса Исроил назоратидаги ҳудуд кенгайиб, Ҳамас бошқарадиган қисм торайиб бормоқда. Ғазодаги икки миллион аҳолининг мутлақ кўпчилиги айнан шу кичик ҳудудда яшайди.
Агар сулҳ жараёни давом эца, Исроил ҳали ҳам Ғазодан чиқиб кетиши мумкин. Аммо сулҳнинг кейинги босқичлари бўйича иш тўхтаб қолгандек кўринмоқда. Июл ойида АҚШ расмийлари Ҳамас билан қуролларни топшириш борасида келишувга эришилганини билдирганди. Бироқ Нетаняҳу бу режани рад этди. У Фаластиндаги гуруҳ «ҳақиқий қуролсизланмагунча» қўшинларни олиб чиқишдан бош тортди.
Исроил армияси баёнотида Ғазодаги базаларни «ўз мудофаа консепсияси, оператив эҳтиёжлари ва ўт очишни тўхтатиш келишувига мувофиқ» қураётганини маълум қилди. Армиянинг қўшимча қилишича, бу базалар Исроил қўшинларини ҳам, яқин атрофдаги аҳоли пунктларини ҳам ҳимоя қилиш учун мўлжалланган.
Бироқ Исроил аскарлари Ғазода ҳарбий постлар қуриш билангина чекланмаган. Улар тўсиқлар жойини ўзгартирган, тупроқ уюмлари барпо этган ва айрим ҳудудларга киришни тақиқлаб қўйган.