Исроил Нидерландия санксияларига дипломатик чора билан жавоб берди
Исроил Нидерландиянинг Рамаллоҳдаги ваколатхонаси ходимларига берган дипломатик мақомини бекор қилишини эълон қилди. Бу қарор Нидерландиянинг Ғарбий соҳил, Шарқий Қуддус ва Жўлон тепаликларидаги Исроил аҳоли пунктларида ишлаб чиқарилган маҳсулотлар импортини тақиқлашига жавобан қабул қилинди.
Исроил Нидерландия санксияларига дипломатик жавоб қайтарди
Реутерснинг 27-сентабр куни берган хабарига кўра, Исроил Ташқи ишлар вазирлиги мамлакат расмийлари томонидан аккредитация қилинган нидерландиялик дипломатларнинг мақомини бекор қилган. Уларнинг дипломатик мақоми етти кундан кейин кучини йўқотади.
Исроил ташқи ишлар вазири Гидеон Саар Х ижтимоий тармоғида қарорга изоҳ бериб, Нидерландия фаластинликлар билан муносабатларда ўз манфаатларини билдиришда давом этиши мумкинлигини, бироқ буни Исроил ҳудудидан амалга оширмаслиги кераклигини айтган.
«Агар Нидерландия фаластинликлар олдида ўз манфаатларини ифода этишни давом эттирмоқчи бўлса, буни Исроил давлати ҳудудидан эмас, Фаластин мухторияти ҳудудидан амалга ошириши мумкин», - деб ёзган Саар.
Тақиқ шахсий багаж ва сувенирларга ҳам тегишли
Хабарга кўра, 22-сентабрдан бошлаб Нидерландия, шунингдек, Буюк Британия, Франсия, Канада, Дания ва бошқа бир қатор давлатлар Ғарбий соҳил, Жўлон тепаликлари ҳамда Шарқий Қуддусдаги Исроил аҳоли пунктларига қарши санксиялар жорий этган.
Импорт тақиқи ушбу аҳоли пунктларидан олиб кириладиган барча маҳсулотларга, жумладан, саёҳатчиларнинг шахсий багажидаги буюмлар ва сувенирларга ҳам татбиқ этилади.
Нидерландия божхона идоралари изоҳига кўра, товарнинг келиб чиқиш жойи унинг қаерда сотиб олингани ёки ишлаб чиқарилганига қараб белгиланади. Шу сабабли чеклов Исроилдан олиб келинадиган барча маҳсулотларга эмас, айнан шу аҳоли пунктларида харид қилинган ёки ишлаб чиқарилган товарларга тааллуқлидир.
Тҳе Тимес оф Исраел нашри суҳбатлашган йўловчилар Амстердам аеропортида багаж текширувлари аввалгидан ҳам синчковроқ ўтказилаётганини айтган.
Исроил 1967-йилдаги Олти кунлик уруш вақтида, ундан олдин Иордания аннексия қилган Иордан дарёсининг Ғарбий соҳили устидан назорат ўрнатган.
Кейинги ўн йилликларда Исроил бу ҳудудда ўнлаб аҳоли пунктларини барпо этган. Хабарда айтилишича, уларда қарийб 500 минг яҳудий яшайди. Ғарбий соҳилдаги фаластинликлар сони эса тахминан 3 миллион кишини ташкил этади.