Исроил Ғазодан учирилган варраклар сабаб зарбаларни кучайтириш билан таҳдид қилди

Исроил Ғазодан учирилган варраклар сабаб зарбаларни кучайтириш билан таҳдид қилди.

Исроил мудофаа вазири Исроил Кац Ғазо секторидан учирилаётган варраклар, дронлар ва шарлар туфайли ҳудудга қарши зарбалар кучайтирилиши мумкинлигини маълум қилди. У бундай ҳолатларга нисбатан “кучли чоралар” кўрилишини таъкидлади.

Маҳаллий ОАВ хабарларига кўра, ўтган ҳафта Исроилнинг Ғазо чегараси яқинидаги ҳудудларида бир нечта варрак топилган. Хусусан, Наҳал Оз кибуцида 21–22-август кунлари тўртта варрак аниқланган. Исроил ҳарбийлари уларнинг ҳеч бирида портловчи ёки шубҳали модда бўлмаганини ва хавф туғдирмаганини маълум қилган.

Кац Исроилнинг бундай ҳолатларга нисбатан “нол тоқат” сиёсатини қўллашини билдириб, портловчи модда бўлган ёки бўлмаганидан қатъи назар, шар ва варраклар дрон сифатида кўрилишини айтди.

ҲАМАС эса варраклар учун жавобгарликни рад этди. Гуруҳ уларни вайроналар орасида қолган болалар учираётган оддий ўйинчоқлар деб атаб, Исроилнинг баёнотларини Ғазодаги ҳужумларни давом эттириш учун “баҳона” сифатида баҳолади.

23-август куни Фаластин соғлиқни сақлаш идоралари Ғазонинг марказий қисмидаги Нусейрат қочқинлар лагери ва аз-Завайда шаҳрига берилган икки зарба оқибатида икки киши ҳалок бўлгани, етти киши яраланганини маълум қилган. Исроил ҳарбийлари эса зарбалардан бирида Ҳамаснинг қурол ишлаб чиқариш обьектига қўмондонлик қилган шахс йўқ қилинганини билдирган.

Аввалроқ Исроил армияси 2024-йилда Ғазода 5 ёшли Ҳинд Ражабнинг ўлими билан боғлиқ ҳодиса юзасидан ҳарбийларига қарши жиноий иш очишга қарор қилгани ҳақида хабар берилганди. Тергов бошланишига воқеа пайтидаги отишма ва тез ёрдам машинасининг ҳаракатини мувофиқлаштиришда тахминий қоидабузарликлар асос бўлган.