“Исроил Эронга жавоб қайтаришга тайёр” – Кац

Кац: "Исроил Эронга жавоб қайтаришга шай"

Исроил мудофаа вазири Исроил Кац 2-сентябр куни Эрон ҳужум қилган тақдирда, Исроил катта куч билан жавоб беришга тайёрлигини маълум қилди. Бу баёнот Эрон кучлари минтақадаги АҚШ ҳарбий позицияларига зарба берганидан сўнг янгради.

Исроил Кацнинг таъкидлашича, Исроил кучлари сентябр ўрталарида бошланадиган муҳим яҳудий байрамлари пайтида Эрон томонидан бўлиши мумкин бўлган ҳужумга тайёр турибди.

"Ҳозирча улар Исроилдан ташқари бутун минтақа бўйлаб зарба бермоқда. Аммо уларнинг бизга ҳужум қилиш эҳтимоли бор. Биз бунга мудофаа нуқтайи назаридан тайёрмиз", деди у Исроил ОАВга.

"Агар Эрон ҳужум қилса, Исроил тўғридан-тўғри, жуда катта куч билан жавоб беради", дея қўшимча қилди Кац.

У, шунингдек, самолётлар ҳавога кўтарилишга тайёр эканини билдирди.

Эрон 2-сентябрга ўтар кечаси Американинг кенг кўламли бомбардимонидан сўнг Яқин Шарқдаги АҚШ обьектларига кетма-кет ҳужумлар уюштирди.

Исроил АҚШ билан бирга феврал ойи охирида Эронга қарши уруш бошлаган эди. Бироқ президент Доналд Трамп апрел ойида мўрт сулҳга эришганидан бери Тел-Авив ҳарбий жиҳатдан четда турибди.

"Улар яҳудий байрамларида ҳужум қилишни яхши кўради, чунки яҳудийларни ёмон кўради. Ўтмишда содир бўлган кўплаб воқеаларга эътибор беринг. Лекин биз мудофаа ва ҳужум борасида АҚШ билан ҳамкорликда тайёргарлик кўриб қўйганмиз", деди Кац.

Эрон раҳбарлари Исроилга кескин қарши ва ҲАМАС каби қуролли гуруҳларни қўллаб-қувватлайди. Лекин Эрон ҳукумати конституцияга кўра мамлакатдаги минглаб кишилардан иборат яҳудийлар жамоасини расман тан олади.

Исроил урушнинг дастлабки босқичида Эроннинг олий раҳнамоси Оятуллоҳ Али Хоманаийни ўлдирган эди. Эрон нефтга бой Форс кўрфазига кириш йўли ҳисобланган Ҳормуз бўғозидаги тижорат кемаларига ҳужум қилгач, АҚШ ва Эрон ўртасидаги сулҳ бузилди. Теҳрон бу бўғозни ўзининг асосий босим воситаси деб билади.