Испанияда ошқозонида кокаин олиб киришга уринган эркак ушланди

Испанияда ошқозонида кокаин олиб киришга уринган эркак ушланди

Испаниянинг Палма-де-Малёрка аеропортида ошқозонида 1,3 килодан ортиқ кокаин олиб ўтишга уринган эркак қўлга олинди. Бу ҳақда Билд хабар берди.

Испания Миллий полицияси маълумотига кўра, 46 ёшли йўловчи Белгиянинг Шарлеруа шаҳридан учиб келган. Белгия ҳуқуқ-тартибот идоралари испаниялик ҳамкасбларини эркак наркотик контрабандасига алоқадор бўлиши мумкинлиги ҳақида огоҳлантирган.

Самолёт қўнгач, у божхона, Фуқаролик гвардияси ва полиция ходимлари томонидан қўлга олинган. Эркак рентген текширувига юборилган. Текширув натижасида унинг овқат ҳазм қилиш тизимида кўплаб шубҳали капсулалар борлиги аниқланган.

Шифохонада унинг организмидан 109 та оқ капсула чиқариб олинди. Экспертиза капсулалар ичида умумий оғирлиги 1,353 килограмм бўлган кокаин борлигини тасдиқлади. Ҳуқуқ-тартибот идоралари бундай усулда гиёҳванд моддаларни олиб юриш ўта хавфли эканини таъкидлади. Ҳатто битта капсуланинг шикастланиши ҳам организмнинг оғир заҳарланишига олиб келиши мумкин.

Уни гиёҳванд моддалар контрабандаси бўйича тергов давомида ҳибсда сақлашга қарор қилинди.

Маълумот ўрнида, апрел ва сентябр ойларида почта орқали Африка (782 гр) ҳамда Германиядан (4 кило) Тошкентга кокаин юборилгани аниқланганди. Шунингдек, Таиланддан Тошкентга 11 кило наркотик транзит қилиниши олди олинганди.