Ислом Махачев навбатдаги жангини қачон ва кимга қарши ўтказмоқчи эканлиги маълум бўлди

Ислом Махачевнинг кейинги жанги қачон ва кимга қарши бўлиши аниқланди.

Ярим ўрта вазн тоифасида УФС чемпиони Ислом Махачев Ян Мачадо Герри билан беш раундлик жангдан сўнг тез орада октагонга қайтиш ниятида. Филаделфияда бўлиб ўтган УФС 330 турниридан кейинги матбуот анжуманида россиялик жангчи ўз режаларини маълум қилди.

"Рамазонгача яна бир марта жанг қилишимиз керак. Январда ёки йил охиригача октагонга чиқишим лозим. Энди йигирма ёшли йигитча эмасман, ёшим 34 да ва иложи борича тез-тез жанг қилишим керак. Кўп вазн ташламайман, жиддий жароҳатларим ҳам йўқ. Эҳтимол, бурнимни яна бир марта текширтириб олишим керакдир, бироқ шунинг ўзи етарли", — деди Махачев.

Шунингдек, Махачев ярим ўрта вазн тоифасига ҳали тўлиқ мослашиб улгурмаганини ва келгуси жанггача жисмонан кучаймоқчи эканини таъкидлади: "Оғир жанглар инсонни тоблайди, мен ҳам янада кучайганимни ҳис қиляпман. Ҳали яна вазн йиғишим ва кучлироқ бўлишим керак, бунинг учун эса менда вақт бор. Ушбу жанг шуни кўрсатдики, тўқнашув қанчалик осон ёки қийин бўлмасин, мен учун у биринчи сониядан то охиргисигача ҳақиқий урушдир".

Навбатдаги рақиб ким бўлиши ҳақидаги саволга эса россиялик жангчи анчадан буён титул жангига лойиқ бўлиб келаётган Карлос Пратесни танлаган бўлишини айтди.