Ирландия Республикаси бўйлаб кенг кўламли иш ташлашлар бошланди

Ирландия Республикаси бўйлаб кенг кўламли норозилик намойишлари бошланди

Бошқа давлат сектори касаба уюшмалари 14 ва 21 октябрга режалаштирилган иккита иш ташлаш олдидан яқин кунларда қоидаларга мувофиқ ишлаш (work-to-rule) акциясини бошлаши кутилмоқда.

Ирландия Республикасида соғлиқни сақлаш, таълим ва маҳаллий кенгашларнинг айрим ходимлари давлат секторидаги иш ҳақи бўйича давом этаётган низо фонида норозилик акцияларини бошлашди.

Чоршанба куни эрталаб 100 000 дан ортиқ ходим, жумладан, ҳамширалар, мактаб ходимлари ва давлат хизматчилари қоидаларга мувофиқ ишлаш чораларини бошлашди.

Ирландия ҳамширалар ва доялар ташкилоти (INMO) давлат соғлиқни сақлаш хизмати ходимлари фақат беморлар хавфсизлиги учун зарур бўлган вазифаларни бажаришини ва «ҳеч қандай қўшимча ҳақ тўланмайдиган соатларда ишламаслигини» маълум қилди.

14 ва 21 октябрь кунларига иккита тўлиқ иш ташлаш куни белгиланган бўлиб, ўша кунлари мактаблар ёпилиши ва бутун мамлакат бўйлаб пикетлар пайдо бўлиши кутилмоқда.

INMO ташкилотининг билдиришича, қоидаларга мувофиқ ишлаш акциясида қатнашаётган ҳамширалар ва доялар «бевосита беморларни парвариш қилиш учун қатъий зарур бўлган ҳоллардан ташқари, ноклиник йиғилишларда қатнашмайдилар».

Уларга Республиканинг энг йирик давлат сектори касаба уюшмаси бўлмиш Fórsa ҳам қўшилди, бу қарорни овоз беришда иштирок этган аъзоларнинг 96,6 фоизи қўллаб-қувватлаган.

Соғлиқни сақлаш ва маъмурият соҳасидаги давлат сектори ходимлари манфаатларини ҳимоя қилувчи SIPTU аъзолари ҳам қоидаларга мувофиқ ишлаш чораларига қўшилишди.

Fórsa ўз веб-сайтида аввалги келишув муддати 30 июнда тугаганидан кейин Ирландия ҳукумати билан давлат секторидаги иш ҳақи бўйича янги келишув юзасидан «ҳозирда ҳеч қандай музокаралар олиб борилмаётганини» маълум қилди.

Унда айтилишича, давлат иш берувчилари билан музокаралар «ҳукуматнинг ҳар қандай музокаралар бошида яшаш минимуми харажатлари билан боғлиқ чораларни кўриб чиқишни истамаслиги» сабабли кечиктирилган.

Шунингдек, унда шундай дейилган: «Давлат хизмати тўғрисидаги келишув мавжуд бўлмагани сабабли, биз ҳозирда давлат хизмати ходимларининг иш берувчиси сифатида ҳукумат билан низодамиз».

SIPTU бўлим ташкилотчиси Брендан О'Брайен ходимларнинг «яхши нияти» давлат хизматлари фаолиятини давом эттиришининг асосий сабаби бўлганини, бироқ Ирландия ҳукуматининг расмий музокаралар учун асос ярата олмагани «аъзоларимизни жамоавий ҳаракат қилишдан ўзга чорасиз қолдирганини» айтди.

У қўшимча қилди: «Биз давлат хизмати иш берувчилари ва ҳукуматни ушбу низонинг кучайишига йўл қўймаслик учун зудлик билан ва конструктив тарзда ҳамкорлик қилишга чақирамиз».

Ирландия Давлат харажатлари вазирлиги Ирландиянинг RTÉ телерадиокомпаниясига касаба уюшмалари ва вакиллик уюшмалари музокараларга киришиш ўрнига норозилик акцияларини бошлашганини маълум қилди.

«Касаба уюшмалари янги келишув бўйича стол атрофига ўтириб, конструктив мулоқот қилишни истамаётгани сабабли кенг жамоатчиликнинг кундалик ҳаётида жиддий узилишлар юзага келиши мутлақо адолатсизликдир», деди матбуот котиби.

«Мутасаддилар ҳамкорликка тайёр ва бу ҳеч қандай кечикишларсиз амалга оширилиши керак».

«Сезиларли натижага фақат иккала томон ҳам ҳеч қандай олдиндан шартларсиз, конструктив ва давомли ҳамкорликка очиқ бўлган тақдирдагина эришиш мумкин», дея қўшимча қилди вазирлик.

Ирландия ўрта мактаб ўқитувчилари уюшмаси (ASTI) ва Ирландия миллий ўқитувчилар ташкилоти (INTO) 5 октябрдан бошлаб қоидаларга мувофиқ ишлаш акциясини бошлашларини, сўнгра 14 октябрда тўлиқ бир кунлик иш ташлашга ўтишларини тасдиқладилар.

ASTI ташкилотининг билдиришича, унда 20 000 гача ўрта мактаб ўқитувчилари иштирок этади.

Бошланғич мактаб ўқитувчиларининг аксариятини ифодаловчи INTO ташкилоти 21 октябрда иккинчи бир кунлик иш ташлашни ўтказишни режалаштираётганини маълум қилди.

Гарда (полиция) вакиллик уюшмасининг оддий аъзолари ҳам шароитларни яхшилашни талаб қилиб, бир неча кунлик норозилик акцияларини эълон қилишди.