Иркуцкдаги касаллик гумони: Ўзбекистонда хизматлар тайёргарлиги кучайтирилди
Россиянинг Иркуцк вилоятида ўта хавфли юқумли касалликка гумон қилинган ҳолат ҳақидаги хабарлар юзасидан расмий ахборот берилди. Ўзбекистонда бундай касалликларнинг кириб келиши ва тарқалишининг олдини олиш учун тегишли хизматлар тайёргарлиги кучайтирилган.
Иркуцкдаги касаллик гумони: Ўзбекистонда хизматлар тайёргарлиги кучайтирилди
Расмий маълумотга кўра, Иркуцк вилоятидаги ҳолат юзасидан ижтимоий тармоқлар ва айрим ахборот манбаларида турли хабарлар тарқалмоқда. Вазият Россиянинг ваколатли идоралари ҳамда Жаҳон соғлиқни сақлаш ташкилотининг расмий манбалари орқали доимий равишда кузатиб борилмоқда.
Хусусан, касаллик ташхиси лабораторияда тасдиқланган ёки тасдиқланмагани, эҳтимолий юқиш манбаи ва йўллари ўрганилмоқда. Шунингдек, беморнинг ҳаракатланиш йўналиши ҳамда у билан мулоқотда бўлган шахсларга доир маълумотлар ҳам аниқлаштирилмоқда.
Эълон қилинган ахборотда касаллик номи ошкор этилмаган ва ташхис лабораторияда тасдиқлангани ҳақида хулоса берилмаган.
Айни пайтда Ўзбекистон ҳудудига ўта хавфли юқумли касалликлар кириб келиши ва тарқалишининг олдини олиш учун тегишли хизматларнинг тайёргарлиги кучайтирилгани билдирилди.
Фуқароларга тасдиқланмаган хабарларга ишонмаслик ва маълумотларни фақат расмий манбалар орқали кузатиб бориш тавсия этилди.
Эпидемиологик вазият ўзгарса, жамоатчиликка белгиланган тартибда қўшимча ахборот берилади.