Индонезияда чўккан паром: 129 киши беш кундан буён топилмаяпти
Ява денгизида ҳалокатга учраган кемадагиларни қидирув ишлари давом этмоқда. Бортида 243 киши ва 89 та автомобил бўлган улкан паром сув остида, қарийб 30 метр чуқурликда ётибди. Фожида 108 киши омон қолган, 129 киши эса беш кундан буён бедарак.
**Индонезияда чўккан паром: 129 киши беш кундан буён топилмаяпти**
13-сентабрга ўтар кечаси Ява денгизида фалокатга учраган Индонезия йўловчи паромидан бедарак йўқолганларни қидириш беш кундир давом этмоқда. Ҳодиса Ява ва Борнео оролларини боғловчи, тахминан 20 соатлик денгиз йўналишида юз берган эди.
Сурабая шаҳридан йўлга чиққан «Вирго Транспорт 8» пароми капитани 3 метргача кўтарилган тўлқинлар орасида кема оғаётганини билдирган фавқулодда сигнал юборган. Якшанба куни тунги соат иккилар атрофида алоқа узилган. Икки соатдан кейин эса кема ўз манзили — Банжармасиндан қарийб 148 километр узоқликдаги сувларда ағдарилгани маълум бўлган.
Шу билан бирга, агентлик Индонезияда йўловчиларнинг ҳақиқий сони рўйхатдагидан фарқ қилиши одатий ҳол эканини эслатади.
Фалокат оқибатида олти киши ҳалок бўлган, 108 киши омон қолган, 129 киши эса ҳануз бедарак. Реутерс нашри бу рақамлар якшанба кунидан бери ўзгармаганини ёзмоқда.
119 метрли паром 1987-йилда Японияда қурилган. У ўтган йилгача кунчиқар юртда хизмат қилган, кейин эса Индонезиядаги ҳозирги оператори — ПТ Вирго C.SH. компаниясига сотилган.
**Бир неча дақиқада юз берган фожиа**
Омон қолганларнинг ҳикоялари ҳалокат қанчалик тез содир бўлганини кўрсатади. Индонезия давлат ахборот агентлиги билан суҳбатлашган экипаж аъзоси Акмал ҳеч қандай огоҳлантирувчи белги сезмаганини айтади:
«Кема жуда тез, беш дақиқага қолмай чўкиб кетди»
Унинг сўзларига кўра, у сигнални кемадан хавфсиз масофага чиққачгина эшитган.
Паромда официант бўлиб ишлаган Ризки Априаншаҳни дўстлари тунги соат бирларда уйғотганида, кема аллақачон қарийб 30 градусга оғиб қолган эди. Ризки ҳам огоҳлантирув сигнали чалинмаганини айтган. У дўстлари билан сувда қалқиб юрган катта газ баллонига ёпишиб, 10 соатча нажот кутган.