Индонезияда 7,7 магнитудали зилзила юз берди. Қурбонлар бор (фото, видео)
Индонезиянинг шарқий қисмида 15-август куни эрталаб содир бўлган 7,7 магнитудали кучли зилзила оқибатида камида беш киши ҳалок бўлди, бинолар вайрон бўлди ва минглаб аҳоли хавфсиз жойларга эвакуация қилинди. Бу ҳақда Реутерс агентлиги хабар берди.
Зилзила Флорес ороли яқинида юз берган. АҚШ Геология хизмати маълумотларига кўра, унинг эпицентри Шарқий Нуса-Тенггара провинсиясидаги Энде шаҳридан 68 километр шимоли-ғарбда, 10 километр чуқурликда жойлашган. Индонезия сейсмология хизмати эса зилзила чуқурлигини 15 километр деб қайд этган.
Оролнинг Маумере шаҳрида бир қатор бинолар қулаган. Касалхоналардаги беморлар хавфсизлик мақсадида ташқарига чиқарилган, тиббиёт ходимлари очиқ ҳавода вақтинчалик даволаш жойларини ташкил этган. Айрим ҳудудларда электр таъминоти ва алоқа узилган.
Шарқий Нуса-Тенггара губернатори Эмануел Мелкиадес Лака Лена беш киши ухлаб ётган пайтда қулаган конструксиялар остида қолиб ҳалок бўлганини маълум қилди. Шу билан бирга, мамлакат Табиий офатларни бошқариш агентлиги дастлаб бир киши ҳалок бўлгани ва тўрт киши жароҳатланганини билдирган.
Зилзиладан сўнг сунами хавфи эълон қилинди. Айрим ҳудудларда баландлиги бир метрдан паст бўлган тўлқинлар қайд этилган, бироқ тахминан уч соатдан сўнг огоҳлантириш бекор қилинди.
Нагекео ҳудудида қарийб 2 минг киши уйларини тарк этган. Зилзила Шарқий ва Ғарбий Нуса-Тенггара ҳамда Жанубий Сулавесининг айрим қисмларида ҳам кучли сезилган. Асосий силкиниш ортидан ўнлаб афтершоклар қайд этилган.
Индонезия Тинч океанининг сейсмик фаол “Олов ҳалқаси” ҳудудида жойлашгани сабабли мамлакатда кучли зилзилалар тез-тез содир бўлади. 1992-йилда айнан Флорес оролида юз берган зилзила ва сунами қарийб 2,5 минг кишининг ҳаётига зомин бўлган. 2004-йилда Суматра яқинидаги 9,1 магнитудали зилзила келтириб чиқарган сунами эса бир неча мамлакатда 230 мингга яқин одамни ҳалок қилган.
Аввалроқ Колумбияда 7,4 магнитудали зилзила юз бергани, табиий офат оқибатида 132 киши ҳалок бўлгани хабар қилинганди. 28-июл куни Япониянинг Кюсю оролида 7,1 магнитудали зилзила қайд этилган. Кейинчалик қурбонлар сони 13 кишига етгани маълум қилинганди. 20-июл куни Перунинг тоғли ҳудудида содир бўлган иккита зилзила оқибатида камида олти киши ҳалок бўлган, 21 киши жароҳатланган.