Икки ўзбекистонлик шахматчи дунёнинг энг кучли бешта шахматчиси қаторига кирди
Ўзбекистонлик икки шахматчи дунёнинг энг кучли бешта шахматчиси қаторидан жой олди
Классик шахмат бўйича жорий рейтингга кўра, Ўзбекистоннинг бир йўла икки вакили дунёнинг энг яхши беш шахматчиси қаторидан жой олди. Жавоҳир Синдаров учинчи ўринга кўтарилди, Нодирбек Абдусатторов эса бешинчи ўринда бормоқда.
Синдаров бунга АҚШ чемпионатида америкалик Фабиано Каруананинг Энди Вудворддан учраган мағлубиятидан сўнг эришди. Ўзбекистонлик гроссмейстернинг рейтинги 2782 очкога етди, бунинг шарофати билан у 2780,3 кўрсаткич билан тўрттинчи ўринга тушиб кетган Каруанани ортда қолдирди.
Live-рейтингда Синдаровдан фақат норвегиялик Магнус Карлсен (2823 очко) ва америкалик Хикару Накамура (2792) юқорироқ жойлашган.
Нодирбек Абдусатторов 2780 очко билан бешинчи ўринни эгаллаб турибди.
Live-рейтинг ўйналган партиялардан сўнг янгиланади, FIDE расмий рейтинги эса белгиланган жадвал бўйича қайта кўриб чиқилади. Октябрь ойидаги расмий рейтингга кўра, Синдаров тўрттинчи, Абдусатторов эса бешинчи ўринни эгаллаб турибди.
Аввалроқ Абдусатторов Синдаровнинг истеъдоди тарихдаги энг кучли ўйинчилардан бири деб ҳисобланган шахмат бўйича 13-дунё чемпиони Гарри Каспаров билан бир қаторда туришини айтган эди. У, шунингдек, ҳамюртининг муваффақиятлари ўзи учун илҳом манбаи бўлганини ва ўз кучига бўлган ишончни қайтарганини тан олди.