Ижтимоий ҳимоя агентлиги фуқароларнинг Ижтимоий реестрдан чиқарилишига изоҳ берди
Ижтимоий ҳимоя агентлиги фуқароларнинг Ижтимоий реестрдан чиқарилишига муносабат билдирди
Миллий ижтимоий ҳимоя агентлиги ижтимоий тармоқларда фуқароларнинг Ижтимоий реестрдан чиқарилиши билан боғлиқ муҳокамалар фонида расмий баёнот берди.
Идора оиланинг реестрдан чиқарилишининг ўзи қашшоқликнинг автоматик равишда камайганини англатмаслигини, бундай қарорлар эса белгиланган режа ёки кўрсаткичларни бажариш учун қабул қилинмаслиги кераклигини таъкидлади.
Агентлик хабарига кўра, Ижтимоий реестрнинг асосий мақсади — муҳтож фуқароларни аниқлаш, уларни ижтимоий ҳимоя билан қамраб олиш ва зарур ёрдам кўрсатишдир. Шу билан бирга, муайян ҳудудлардаги қашшоқлик даражаси Жаҳон банки методологияси асосида ўтказиладиган сўровномалар натижаларига кўра белгиланади. Реестрдан чиқариш фақат оиланинг ижтимоий-иқтисодий аҳволи ҳақиқатда яхшиланганда ва у белгиланган мезонларга жавоб бергандагина амалга оширилиши лозим.
Қоидаларга риоя этилишини назорат қилиш мақсадида Агентлик ҳузуридаги Ижтимоий ҳимоя инспекцияси реестрдан чиқарилган оилалар юзасидан текширувлар ўтказиб, қабул қилинган қарорлар белгиланган меъёрларга мувофиқлигини ўрганмоқда. Идоранинг маълум қилишича, асосий вазифа фуқароларни ҳисобга олиш тизимидан расмиятчилик учун чиқариш эмас, балки оилаларни қашшоқликдан ҳақиқатда олиб чиқиш ва муҳтожларнинг ижтимоий қўллаб-қувватланишга бўлган ҳуқуқларини таъминлашдан иборат.