Ижара муносабатларида “тижорат ижараси” тоифаси жорий этилади
Ўзбекистонда ауксион орқали ижарага олинган ер майдонларини бошқа тадбиркорларга иккиламчи ижарага бериш, тадбиркорлик фаолияти учун “тижорат ижараси” тоифасини жорий этиш ҳамда ижарачи томонидан обьектга киритилган инвестицияларни қоплашнинг ҳуқуқий кафолатларини кучайтириш режалаштирилмоқда. Президент фармонига кўра, икки ой ичида тегишли қонун лойиҳаси ишлаб чиқилиши керак. Жисмоний шахс ўзига тегишли кўчмас мулкни ўзига тегишли юридик шахсга ижарага берса, ижара тўловининг минимал миқдори амал қилмайди.
Ўзбекистонда ижара муносабатларини такомиллаштиришга қаратилган қонун лойиҳаси ишлаб чиқилади, унда "тижорат ижараси" тоифаси жорий этилиши кўзда тутилган. Бу ҳақда Президент фармонида белгиланган.
Маълумот учун, тижорат ижарасига оид ҳуқуқий механизмларни такомиллаштириш таклифи Корзинка супермаркетлар тармоғи асосчиси Зафар Ҳошимов томонидан давлат раҳбари билан учрашувда илгари сурилган эди. Президентнинг юқоридаги фармони айнан ўша учрашув якунлари бўйича қабул қилинган. Ижара муносабатларига оид ушбу қонун лойиҳаси 2026-йил октабр ойи охирига қадар тайёрланиши лозим.
Фармонда назарда тутилган яна бир қонун лойиҳасига кўра, юридик шахснинг жисмоний шахс бўлган таъсисчиси томонидан ушбу юридик шахсга ижарага ёки текин фойдаланишга берилган кўчмас мулк обьектларига нисбатан ижара тўловининг энг кам миқдори қўлланмайди.
Эслатиб ўтамиз, май ойида қабул қилинган бошқа бир фармонга биноан, 2027-йил 1-январдан бошлаб Тошкент шаҳридан ташқари ҳудудларда жисмоний ва юридик шахслар томонидан тадбиркорлик субьектларига умумий майдони 1000 квадрат метрдан ортиқ бўлган мол-мулк ижарага берилганда, солиққа тортиш мақсадида ижара тўловининг энг кам ставкалари қўлланмаслиги белгиланган эди.