ИИВ ва Марказий банк кибержиноятларга қарши махсус тизим яратгани маълум бўлди
Ушбу махсус тизим йўлга қўйилгани натижасида 6 ойда 29 трлн сўм пул ноқонуний равишда четга чиқиб кетишининг олди олинган. Шунингдек, 18 838 та жиноятга алоқадор банк карталари блокланган.
ИИВ ва Марказий банк ҳамкорлигида кибержиноятларга қарши курашиш учун махсус тизим ишга туширилгани маълум қилинди. Бу ҳақда Ички ишлар вазирлигининг навбатдаги Ҳайъат йиғилишида таъкидланди.
Вазирлик тизимида 2026-йил "Кибержиноятларга қарши курашиш йили" деб эълон қилинган бўлиб, бу йўналишда профилактик чоралар сезиларли даражада кучайтирилган.
Қайд этилишича, Марказий банк билан биргаликда яратилган ушбу махсус тизимнинг жорий этилиши натижасида 29 триллион сўм миқдоридаги пул маблағларининг ноқонуний равишда мамлакатдан чиқиб кетишининг олди олинди. Шунингдек, жиноятларга алоқадор бўлган 18 838 та банк картаси блокланди.
Ўтган олти ой давомида жами 9 282 та кибержиноят фош этилган, шундан 4 011 та жиноят ташаббус асосида аниқланган. Бундан ташқари, 13 мингдан ортиқ фуқарога етказилган 120 миллиард 496 миллион сўмдан зиёд моддий зарар қопланган.
Йиғилишда амалга оширилаётган ишлар етарли эмаслиги танқид остига олинди. Хусусан, фуқаролардан келиб тушаётган мурожаатларни ҳар томонлама ва чуқур ўрганиш, кибержиноятларнинг содир этилиш сабаблари ва уларга имкон берувчи омилларни чуқур таҳлил қилиш зарурлиги алоҳида таъкидланди.