ICE агенти таъқиб пайтида Техасдаги иммигрантни машинаси билан уриб юборгани учун айбланди
АҚШда ноқонуний яшаб келган Мексика фуқароси оёғининг бир нечта жойидан синган ва чаноқ-сон бўғинидан жароҳат олган, дейди прокурорлар.
Техасда қувлаш пайтида иммигрантни автомобиль уриб юборганидан кейин ICE агентига айблов қўйилди
Прокурорнинг маълум қилишича, АҚШ иммиграция агенти шу ой бошида Техасда автомобилда бир эркакни уриб юборганликда айбланиб, жиноий жавобгарликка тортилди.
Прокурорга кўра, АҚШ Иммиграция ва божхона назорати (ICE) ходими Марио Альберто Моралесга катта ҳакамлар ҳайъати (гранд-жюри) томонидан ҳалокатли қурол ёрдамида оғир тан жароҳати етказиш айблови қўйилган.
Моралес АҚШда қонуний ҳужжатларсиз яшаб келган Мексика фуқаросини босиб кетишда айбланмоқда, оқибатда жабрланувчининг оёқлари бир неча жойидан синган ва чаноқ-сон бўғини шикастланган.
ICE матбуот котиби айблов хулосасини "сиёсий трюкдан бошқа нарса эмас" деб атади ҳамда айбловларни "масъулиятсизлик ва ёлғон" деб таърифлади.
Ушбу айблов Трамп маъмуриятининг ноқонуний иммиграцияга қарши кураши ҳамда федерал агентлар иштирокидаги тан жароҳатлари ва ўлимларга олиб келган бир қатор зўравонлик ҳодисалари фонида юзага келди.
Харрис округи прокурори Шон Тирга кўра, агар Моралеснинг айби исботланса, у иккинчи даражали оғир жиноят учун икки йилдан 20 йилгача озодликдан маҳрум этилиши мумкин.
Тирнинг айтишича, 10 октябрь эрталаб Моралес АҚШда 30 йилдан ортиқ вақт давомида қонуний ҳужжатларсиз яшаб келган 48 ёшли Мексика фуқароси Мигель Парра-Эрнандес бошқарувидаги автомобилни қувлаган.
Жума куни Хьюстонда бўлиб ўтган матбуот анжуманида Тирнинг билдиришича, Парра-Эрнандес ва яна бир йўловчи машинадан тушиб қочишга уринганида, Моралес "автомобилини агрессив тарзда" ушбу Мексика фуқароси томон бурган.
Унинг айтишича, Парра-Эрнандеснинг судланганлиги бўлмаган ва у депортация қилиниши керак бўлган шахслар рўйхатида турмаган.
"У жаноб Эрнандесни шунчаки уриб юбормай, балки унинг иккала оёғини ҳам босиб кетган, оқибатда у оғир жароҳат олиб, шу кунгача шифохонада қолмоқда", деди Тир.
Шундан сўнг Моралес 911 хизматига қўнғироқ қилиб, Парра-Эрнандес унинг машинасига урилгани ҳақида хабар берган.
Тирнинг таъкидлашича, ICE аслида Мексика фуқароси ва ноқонуний иммигрант Хосе Мендоса-Сервантес исмли шахсни таъқиб қилмоқчи бўлган, бироқ ушбу шахс бундан тўққиз йил муқаддам вафот этган экан.
Ҳодисадан сўнг дарҳол ICE матбуот котиби BBCнинг АҚШдаги медиа ҳамкори CBS News телеканалига Парра-Эрнандес иммиграция агентининг автомобили олдига ўзи югуриб чиққанини айтган эди.
Айблов хулосасидан сўнг ICE жиноий иш қўзғатиш учун етарли далиллар бор-yo'қлигини ҳал қилиш ваколатига эга фуқаролар ҳайъати — гранд-жюри томонидан илгари сурилган айбловларни рад этди.
"Бу Хьюстондаги бошпана бериш сиёсатини қўлловчи сиёсатчиларнинг навбатдаги сиёсий трюкидан бошқа нарса эмас", деди ICE матбуот котиби BBCга берган баёнотида.
"ICE Мигель Парра-Эрнандесни қасддан уриб юборгани ҳақидаги айбловлар МАСЪУЛИЯТСИЗЛИК ва ЁЛҒОНДИР", деди матбуот котиби ва ICE эркаклари ҳамда аёлларига "қонун устуворлигини таъминлаш ишониб топширилгани ва улар профессионаллик, ҳалоллик ҳамда ахлоқий хулқ-атворнинг энг юқори стандартларига амал қилишини" қўшимча қилди.
Баёнотда қўшимча қилинишича, ўз хизмат вазифаларини бажараётган федерал ходимлар хатти-ҳаракатлари фақат бошқа федерал агентликлар томонидан текширилиши мумкин. Матбуот котиби маҳаллий ҳокимият органлари бундай текширув ўтказиш ваколатига эга эмаслигини таъкидлади.
Округ прокурори Тир ҳуқуқни муҳофаза қилиш органларини жуда ҳурмат қилишини ва оғир жиноятлар содир этган ноқонуний шахслар депортация қилиниши кераклигига ишонишини урғулади.
Унинг айтишича, ушбу жиноий таъқиб нафақат Парра-Эрнандес ва унинг оиласи учун адолатни қарор топтиришига, балки "кўчаларимизда бемалол террор ўтказиш ҳуқуқига эгаман деб ҳисоблайдиган ҳар бир ICE ходимига баланд ва аниқ сигнал" бўлишига умид қилади.