Ҳусийлар Европа ва АҚШ кемаларига ҳужум қилмасликка ваъда берди
**Ҳусийлар Европа ва АҚШ кемаларига ҳужум қилмасликка ваъда берди**
Ямандаги Эрон томонидан қўллаб-қувватланадиган ҳусийлар Қизил денгизда Европа ва АҚШ кемаларига ҳужум қилмасликка ваъда берди. Гуруҳ стратегик аҳамиятга эга Боб ал-Мандаб бўғозида назоратни кучайтиришга уринаётган бир пайтда, Европа Иттифоқи ва Вашингтонга кафолат хатлари юборган. Бу ҳақда Финансиал Тимес хабар берди.
Икки дипломатнинг айтишича, ҳусийлар сентябр ойида Европа Иттифоқининг ташқи ва хавфсизлик сиёсати идорасига хат йўллаган. Унда Яманнинг жанубий соҳили бўйлаб амалга оширилаётган ҳужумлар халқаро юк ташувига реал таҳдид эмаслиги ва Боб ал-Мандаб бўғозидаги транзитга таъсир қилмаслиги қайд этилган.
Мазкур хат 10-сентябр куни, яъни гуруҳ Яманнинг Ал-Муха шаҳрини эгаллаган куни юборилган. Ҳусийлар Саудия Арабистони қўллаб-қувватлаётган ҳукумат кучларини мағлуб этиб, Қизил денгиз ва Боб ал-Мандаб бўғозидаги бир нечта оролларни ҳам назоратга олган.
Уммон воситачилигида ўтган музокаралардан кейин ҳусийлар АҚШга тегишли кемаларга ҳам тегмасликка ваъда берган. Шундан сўнг Қўшма Штатлар президенти Доналд Трамп ҳусийлар Вашингтон билан урушишни истамаслигини билдирган. Бироқ ҳусийлар АҚШ террорчилик ташкилотлари рўйхатида бор.
Ҳусийлар август ва июл ойларида Саудия Арабистони билан 2022-йилдаги оташкесимни бузиб, мамлакат портларини қамал қилишини ва танкерларга ҳужум қилишини эълон қилган эди. Аммо юқоридаги хатлар орқали улар можарога халқаро юк ташувчи компанияларни жалб қилмасликка ҳаракат қилмоқда.
Ҳусийлар ҳужум қилмасликка ваъда бергани сабабли Сувайш канали ва Боб ал-Мандаб бўғози орқали ўтадиган контейнер кемалари сони сўнгги уч йилдаги энг юқори даражага чиқди. Маерск ва СМА СГМ каби йирик компаниялар сув орқали қатновларни қайта йўлга қўйди. Хенета таҳлил компанияси маълумотига кўра, Қизил денгиз орқали юк ташиш ҳажми 2023-йилгача бўлган кўрсаткичнинг деярли 30 фоизига етган.
Эроннинг Ҳормуз бўғозида кемалар ҳаракатини чеклаётгани ва ҳусийларнинг янги ҳужумлари танкер эгаларини хавотирга солмоқда. Шу сабабли Европа Иттифоқи ва Саудия Арабистони минтақада хавфсизликни таъминлаш учун денгиз кучларини бирлаштириш масаласини муҳокама қилмоқда.
Масалан, Франсия президенти Эммануел Макрон 24-сентябр куни Саудия Арабистонининг Янбу портига ҳарбийлар ва мудофаа тизимларини юборишини маълум қилди. Буюк Британия бош вазири Энди Бурнҳем эса Қироллик ҳарбий-ҳаво кучларининг Воягер самолётини ҳавода ёнилғи қуйиш миссияси учун ҳудудга жўнатишини айтди.