Ҳусийчилар Ар-Риёддаги аеропортга яна зарба берди: камида 12 киши ҳалок бўлди, 309 киши жароҳатланган
Ҳусийчилар шу ҳафтада учинчи марта Саудия Арабистони пойтахтини нишонга олди. Реутерс манбаларига кўра, ҳужумдан сўнг Ар-Риёддаги шифохоналар тез ёрдам машиналари ва вертолётларда келтирилган ярадорлар билан тўлиб кетган.
Ҳусийчилар Ар-Риёддаги аеропортга яна зарба берди: камида 12 киши ҳалок бўлди, 309 киши жароҳатланган
10-октабр куни ҳусийчилар уюштирган ҳужум натижасида Ар-Риёд халқаро аеропортида камида 12 киши ҳалок бўлди ва юзлаб одамлар жароҳат олди. Бу воқеа Эрон томонидан қўллаб-қувватланадиган ҳусийчилар ва Саудия бощилигидаги коалиция ўртасида ҳарбий ҳаракатлар кучайиб бораётган бир пайтда юз берди.
Саудия Арабистони фуқаро авиацияси маъмуриятининг билдиришича, ҳалок бўлганлар орасида тўрт нафар Саудия Арабистони фуқароси ва икки нафар Бангладеш фуқароси бор. Бундан ташқари, АҚШ, Иордания, Фаластин, Сурия, Судан ва Мисрдан бир нафардан фуқаро ҳам ҳалок бўлган. Сўнгги маълумотларга кўра, жами 309 киши жароҳатланган.
Уларнинг айримлари оғир аҳволда.
Шанба куни Ар-Риёддаги барча рейслар бошқа йўналишларга бурилди ва қарийб 8 миллион аҳолига эга шаҳарга хизмат кўрсатувчи аеропорт фаолияти вақтинча тўхтатилди.
Ҳусийчилар медиа офиси раҳбари ҳужумдан кейин улар "Ар-Риёд халқаро аеропортини ёпиб қўйганини" айтди. Душанба куни ҳусийчилар йўловчи самолётлари Саудия Арабистони ҳаво ҳудудини айланиб ўтиши кераклигини билдириб, бу ҳудудни ҳарбий операциялар зонаси деб эълон қилганди.
Бу зарбалар подшоҳликда ўн йилдан ортиқ вақт ичидаги энг кўп қурбонли ҳужум бўлди ва огоҳлантиришсиз амалга оширилди. Хусусан, Саудия Арабистонининг хавф ҳақида огоҳлантириш тизими ишга тушмади. Шу ҳафта Қирол Холид халқаро аеропортига қилинган олдинги иккита ҳужум оқибатида тўрт киши ҳалок бўлган.