Ҳужумлар авж олгани сабабли АҚШ Давлат департаменти баъзи ходимларига Саудия Арабистонини тарк этишни буюрди
АҚШ мулозимларига огоҳлантириш аэропорт ва нефть конларига берилган сўнгги зарбалар оқибатида камида уч киши ҳалок бўлган бир пайтда янгради.
АҚШ Давлат департаменти ҳужумлар шиддатлашгани сабабли айрим ходимларига Саудия Арабистонини тарк этишни айтди
Яманнинг Эрон томонидан қўллаб-қувватланувчи ҳусийлари шу ой бошида Саудия Арабистони пойтахти Риёддаги аэропортга ҳам зарба берган эди
АҚШ Давлат департаменти мамлакат бўйлаб берилган зарбаларда уч киши ҳалок бўлганидан кейин, ҳужумлар шиддатлашгани сабабли айрим дипломатлар ва уларнинг оилаларига Саудия Арабистонини тарк этишни буюрди.
Саудия расмийларининг билдиришича, нефть конига қилинган ҳужум уриниши пайтида тутиб қолинган дрон парчалари икки кишининг ёстиғини қуритган, яна бир киши эса Даммамдаги Қирол Фаҳд халқаро аэропортига берилган зарбадан сўнг вафот этган.
Яманнинг Эрон томонидан қўллаб-қувватланувчи ҳусийлари ва Саудия Арабистони ўртасидаги низо ўтган ой давомида авж олди.
Саудия зарбаларига жавобан ҳусийлар Саудия Арабистонидаги аэропортлар, энергетика объектлари ва ҳарбий базаларга ракеталар ҳамда дронлар отди. Риёд халқаро аэропортига яқинда қилинган ҳужум қиролликда охирги йилларда содир бўлган энг кўп одам ёстиғини қуритган ҳужум бўлди.
«АҚШ Давлат департаменти Саудия Арабистонидаги фавқулодда вазиятларга жалб қилинмаган АҚШ ҳукумати ходимлари ва уларнинг оила аъзолари учун мамлакатни тарк этиш ҳақида мажбурий кўрсатма чиқарди», — дейди Давлат департаменти матбуот котиби ўз баёнотида.
«Эрон томонидан қўллаб-қувватланувчи ҳусийлар Саудия Арабистонига қарши ҳарбий ҳаракатларни тобора ошириб бормоқда, жумладан, фуқаролик аэропортлари ва бошқа муҳим инфратузилмаларга қилинган ҳужумлар тинч аҳоли орасида талофатларга ва қатноашда жиддий узилишлар келтириб чиқармоқда», — дейилади баёнотда.
Матбуот котиби шунингдек, «ҳарбий ҳаракатлар шиддат билан авж олиш потенциалига эга» эканидан огоҳлантирди.
Расмийларнинг айтишича, Қирол Фаҳд халқаро аэропортига қилинган охирги ҳужумда саккиз киши тан жароҳати олган, жароҳатлар «енгилдан оғиргача» бўлган.
Ҳужум тафсилотлари ҳозирча ошкор қилинмади, аммо бу зарба ҳусийларнинг Саудия Арабистони аэропортларига қилган кетма-кет ҳужумларининг давоми бўлди.
Энергетика вазирлиги шунингдек, Бирлашган Араб Эмирликлари билан чегара яқинидаги Шайба нефть конини нишонга олган ва икки кишининг жароҳатланишига сабаб бўлган дронни ким учирганини айтгани йўқ.
Яман 2014 йилда ҳусийлар ҳукуматни пойтахт Санодан ҳайдаб чиқарганидан бери бошланган фуқаролар урушидан вайрон бўлган. 2015 йилда Саудия бошчилигидаги ҳарбий коалиция ҳукумат бошқарувини тиклашга уринганидан сўнг жанглар янада авж олди.
Охирги тўрт йил давомида норасмий ўт очишни тўхтатиш тартиби амал қилиб келаётган эди, аммо июль ойида ҳусийлар Саудия Арабистонига қарши «денгиз эмбаргоси» эълон қилиб, Саудия аэропортлари, нефть объектлари ва Қизил денгиздаги танкерларга ракета ва дрон ҳужумларини бошлаганидан сўнг у барбод бўлди.
Ҳусийлар буни ўз ҳудудларининг Саудия томонидан қамал қилинишига ва Сано аэропортига берилган, улар қиролликни айбдор деб билган ҳаво зарбасига қасос деб аташди.
Гуруҳнинг Яманнинг жануби-ғарбий соҳили бўйлаб Боб ал-Мандаб бўғизида жорий этган «денгиз эмбаргоси» жаҳонда нефть нархининг ошишига ёрдам берди, чунки АҚШ ва Исроиллинг Эрон билан уруши Кўрфаздаги Ҳурмуз бўғизини амалда ёпиб қўйганидан бери Саудия Арабистони нефть экспорти учун Қизил денгизга таяниб келаётган эди.