Huel рекламаси ўз маҳсулотлари барча анъанавий озиқ-овқатлар ўрнини боса олишини иддао қилгани учун тақиқланди
Рекламани назорат қилувчи органнинг таъкидлашича, томошабинлар ушбу рекламадан барча одатий овқатларни Huel билан алмаштириш "нутрициологик жиҳатдан мақсадга мувофиқ" деган хулосага келишлари мумкин.
Huel рекламаси ўз маҳсулотлари барча анъанавий озиқ-овқатлар ўрнини боса олишини иддао қилгани учун тақиқланди
Huel кўпроқ ўзининг коктейллари билан танилган бўлиб, компания уларни тўйимли ва тўлақонли таом деб атайди
Huel таом ўрнини босувчи коктейллари рекламаси реклама назорат органи томонидан «масъулиятсиз» парҳез амалиётини рағбатлантириши ёки маъқуллаши аниқланганидан кейин тақиқланди.
Рекламада Huel бренди элчиси Спенсер Мэттьюс ўзи учратган, «фақат Huel истеъмол қиладиган» ва 260 километрлик пойгада «катта фарқ билан» ғолиб чиққан одам ҳақидаги воқеани сўзлаб берган.
Реклама стандартлари бошқармаси (ASA) томошабинлар ушбу рекламадан барча анъанавий озиқ-овқатларни Huel билан алмаштириш «нутрициологик жиҳатдан мақсадга мувофиқ» ва юқори жисмоний кўрсаткичларга мос келади, деган хулосага келишлари мумкинлигини билдирди.
Huel компанияси Мэттьюснинг ҳикояси «тавсия ёки кўрсатма» эмаслигини ва реклама «Huel ҳар бир таом ўрнини боса олади» деган фикрга шубҳа туғдиришга қаратилганини айтди.
Instagram’да ҳомийлик пости ва YouTube’да видео бошланишидан олдинги реклама сифатида жойлаштирилган ушбу видеода Мэттьюснинг Huel асосчиси Жулиан Хирн билан подкаст шаклида суҳбатлашаётгани тасвирланган.
Instagram’даги постга шундай изоҳ қолдирилган: «Асосчимиз Huel’дан қандай фойдаланишини кўринг. Спойлер: бу ҳар бир таом ўрнини босиш учун эмас».
Видеода Хирн иш кунлари нонушта ва тушликда Huel маҳсулотларини истеъмол қилишини, лекин уйга қайтганида «анъанавий таом» ейишини айтади.
Шундан сўнг Мэттьюс ультрамарафонда қатнашаётганда «фақат Huel истеъмол қиладиган» бир кишини учратганини айтади.
У аввалига бу одам пойгани якунлай олишига шубҳа қилганини, лекин кейин: «У катта фарқ билан ғолиб чиқди, том маънода ҳаммамизни ортда қолдириб кетди», деб қўшимча қилади.
Хирн бунга жавобан: «Идеал дунёда сиз тўйимли ва тўлақонли табиий озиқ-овқатларни истеъмол қилишингиз керак.
Кўп одамлар буни қилмайди ёки бунга вақт топа олмайди, шунинг учун Huel айнан шу бўшлиқни тўлдиради», дейди.
Рекламада Спенсер Мэттьюс «фақат Huel истеъмол қиладиган» спортчи ҳақида гапиради
Хартфордширда жойлашган Huel компаниясига 2015 йилда Хирн томонидан асос солинган. Ҳозирда у Франциянинг Danone конгломерати томонидан сотиб олиниш жараёнида.
Вақти кам, соғлиғига эътиборли истеъмолчиларга мўлжалланган тўлақонли озуқавий маҳсулотлар бозори 5,9 миллиард доллар (4,4 миллиард фунт стерлинг)га баҳоланмоқда.
ASA реклама бўйича тўртта шикоят олди, уларда мазмуннинг масъулиятсизлиги шубҳа остига олинган. Икки шикоятчи, шунингдек, рекламадаги соғлиқ билан боғлиқ даъволар ASA реклама кодексини бузганлигини даъво қилган.
ASA ўз қарорида рекламада «истеъмолчиларга барча анъанавий озиқ-овқатларни Huel билан алмаштириш тўғридан-тўғри тавсия этилмаганини», лекин томошабинлар барибир бу ҳикояни «мақбул парҳез амалиёти» сифатида талқин қилишлари мумкинлигини таъкидлади.
«Ушбу контекстда фақат Huel истеъмол қилишни тақдим этиш орқали реклама анъанавий озиқ-овқатни тўлиқ Huel билан алмаштириш нутрициологик жиҳатдан мақсадга мувофиқ эканлигини ва юқори жисмоний кўрсаткичларга эришишга ҳеч қандай тўсиқ бўлмаслигини кўрсатди», дейилади қарорда.
ASA, шунингдек, соғлиқ билан боғлиқ даъволар бўйича шикоятни ҳам қаноатлантирди ва Мэттьюснинг ультрамарафон спортчиси ҳақидаги ҳикояси «Huel истеъмол қилиш ва ўта юқори жисмоний ҳамда чидамлилик кўрсаткичларини сақлаб қолиш қобилияти ўртасида ижобий боғлиқлик борлигини англатади» деб қарор қилди.
Шикоятларга жавобан Huel реклама «Huel’ни табиий овқат тайёрлаш имкони бўлмаган ҳолатларда мувозанатли парҳезнинг бир қисми сифатида аниқ кўрсатганини» айтди.
Компания Мэттьюснинг фақат Huel истеъмол қиладиган одам ҳақидаги фикрга «ўта шубҳа ва ишончсизлик» билан муносабат билдирганига эътибор қаратди.
«Бу ҳикоя одатий натижа ёки истеъмолчиларга тақлид қилиш учун тавсия ёки кўрсатма сифатида эмас, балки ажойиб ва кутилмаган ҳодиса сифатида сўзлаб берилган.
Рекламанинг ҳеч бир жойида суҳбатдошлар истеъмолчилар 100% Huel парҳезига ўтишлари кераклигини таклиф қилишмаган».
Бу Huel компаниясининг ўз маҳсулотларини анъанавий озиқ-овқат ўрнини босувчи восита сифатида тақдим этиши туфайли ASA билан боғлиқ муаммога дуч келиши биринчи марта эмас.
Баъзи мутахассислар ҳам таомларни озуқавий моддаларга бой ичимликлар билан алмаштириш қанчалик самарали эканлигини шубҳа остига олишган.
Huel компанияси BBC News’га ASA қарорига амал қилганини маълум қилди.
«Биз Huel’ни парҳезнинг тўлиқ ўрнини босувчи восита сифатида тақдим этмаймиз ва у спорт натижаларини яхшилайди деб даъво қилмаймиз», деди компания вакили.