Ҳоким ёрдамчиларининг 9 та асосий вазифаси белгилаб берилди

Ҳоким ёрдамчиларининг 9 та асосий вазифаси белгиланди

Ҳоким ёрдамчиларининг асосий вазифаларини белгиловчи йўриқнома тасдиқланди. Унда аҳоли бандлигини таъминлашдан бошлаб, маҳалла ихтисослашувини ривожлантириш ва норасмий бандликни камайтиришгача бўлган йўналишлар қамраб олинган.

Йўриқномага мувофиқ, ҳоким ёрдамчилари ҳар чоракда ишсизлар ҳамда даромадини оширишни истаган фуқаролар бўйича маълумот тайёрлайди. Шунингдек, маҳалладаги иш берувчилар ва бўш иш ўринлари рўйхатини тузиб, ишсизларни мавжуд вакансияларга йўналтиради ва уларнинг кейинги бандлик ҳолатини кузатиб боради.

Аҳолини касб-ҳунар ва хорижий тилларга ўқитиш ҳам ҳоким ёрдамчиларининг вазифаларидан бири ҳисобланади. Улар ўқиш истагидаги фуқароларни аниқлаб, касбий таълим ташкилотларига йўналтиради ҳамда ўқишни якунлаганларнинг бандлигини таъминлаш чораларини кўради.

Камбағал оилалар учун эса оиланинг имконияти, кўникмаси ва қизиқишидан келиб чиқиб индивидуал режа ишлаб чиқилади. Шу асосда барқарор бандлик хизматлари кўрсатилади ва оила даромадининг ўсиши доимий мониторинг қилинади.

Ҳоким ёрдамчилари маҳаллаларда микролойиҳалар ташаббускорларини аниқлаш, уларни молиялаштириш ва ишга тушириш, шунингдек, лойиҳалар фаолиятини кузатиб бориш билан ҳам шуғулланади. Маҳалланинг иқтисодий салоҳияти ва ресурсларидан келиб чиқиб, «ўсиш нуқталари» аниқланади ва ҳар йили икки марта маҳалла ихтисослашуви йўналиши белгиланади.

Томорқа ва ижара ерларидан самарали фойдаланиш бўйича «Бир контур — бир маҳсулот» ва «Бир маҳалла — бир маҳсулот» тамойиллари асосида маҳсулот етиштириш ташкил этилади. Томорқа эгалари ва деҳқонларни ўқитиш, кооперация алоқаларини йўлга қўйиш, субсидия ва грантлар ажратишга кўмаклашиш ҳам назарда тутилган. Томорқа ва ижара ерлари йилига уч марта хатловдан ўтказилади.

Бундан ташқари, ҳоким ёрдамчилари маҳалладаги бўш бино ва ер участкаларини аниқлаб, уларни электрон савдога чиқаришга кўмаклашади. Қуёш панеллари, гелиоколлектор ва насос каби энергия самарадор қурилмаларни ўрнатиш истагидаги фуқаролар билан ишлаш ҳам уларнинг вазифасига киради.

Йўриқномада норасмий бандликни қисқартиришга ҳам алоҳида эътибор қаратилган. Ҳоким ёрдамчилари норасмий ишлаётган фуқаролар ва тадбиркорларни аниқлаб, улар ҳақидаги маълумотларни «Онлайн маҳалла» платформасига киритади ҳамда фаолиятини расмийлаштиришга кўмаклашади.