Ҳиндистон ўрмонидан топилган орангутан болалари контрабанда бўйича терговга сабаб бўлди

Ҳиндистон ўрмонида топилган орангутан болалари контрабанда бўйича терговга сабаб бўлди

Ҳиндистон шарқидаги Одиша штати ўрмонида, ўзларининг табиий яшаш жойларидан жуда узоқда бешта орангутан боласи топилди, бу эса уларнинг у ерга қандай келиб қолгани бўйича тергов бошланишига олиб келди.

Интернетда кенг тарқалган фотосуратлар ва видеоларда ёш маймунларнинг ўз ватани бўлган тропик ўрмонлардан минглаб километр узоқликда, ўрмон тупроғида бир-бирига ёпишиб ўтиргани ва банан еяётгани тасвирланган.

Одиша ўрмон хўжалиги вазирининг айтишича, терговчилар ҳайвонлар мамлакатга халқаро контрабанда гуруҳи томонидан олиб кирилиб, автомагистраль яқинида қолдириб кетилган-кетилмаганини ўрганмоқда.

Орангутанлар сешанба куни эрталаб Баласор туманида маҳаллий аҳоли уларни кўриб қолиб, ўрмон хўжалиги ходимларига хабар берганидан кейин қутқарилган.

Уларга биринчи тиббий ёрдам кўрсатилиб, штат пойтахти Бхубанешвардаги Нанданканан ҳайвонот боғига кўчирилди ва ҳозирда у ерда карантинда ва кузатув остида сақланмоқда.

Баласор тумани ўрмон хўжалиги ходими Пратик Пракаш Индалкар BBC’га берган интервьюсида ҳайвонлар Одишага ўзлари етиб кела олмаслигини ва автомобиль йўли орқали олиб келинган бўлиши мумкинлигини айтди.

«Бешта ҳайвон Ғарбий Бенгалия чегараси яқинидаги Бхогараи блокида жойлашган, қўриқхона қилиниши режалаштирилган Ранаката ўрмонидан топилди», деди у.

«Бу ҳудуд асосан казуарина дарахтлари билан қопланган ва қалин ўрмон эмас. Шунингдек, у давлат аҳамиятидаги автомагистралга яқин жойлашган».

Хабар қилинишича, Одиша ҳукумати Ҳиндистоннинг Ёввойи табиатга қарши жиноятларни назорат қилиш бюросидан ҳам тергов ўтказишни сўраган. Терговда полиция, ўрмон хўжалиги ходимлари ва махсус тезкор гуруҳ иштирок этмоқда.

Ўрмон хўжалиги ходимларининг фикрича, орангутанлар бу ҳудудда атиги икки ёки уч кун бўлган.

Ўрмонни тинтув қилиш натижасида бошқа орангутанлар ёки ҳайвонларнинг у ерга қандай келиб қолгани ҳақида ҳеч қандай далил топилмади, деди Индалкар.

Мутасаддилар BBC’га уларни жуда кичик чақалоқлар деб таърифлашди, гарчи баъзи маҳаллий хабарларда уларнинг ёши бир ва икки ёш оралиғида экани айтилган бўлса-да.

Уларнинг жуда ёш экани бу топилмадан айниқса хавотирланишга сабаб бўлмоқда, дейди ёввойи табиат бўйича эксперт Бисважит Моханти.

Ёш орангутанлар одатда бир неча йил давомида оналари билан бирга яшайди ва мустақил яшаб қолиш учун зарур бўлган кўникмаларни ўрганади. Урғочилари ҳам секин кўпаяди, одатда ҳар саккиз йилда бир марта туғади.

Шу сабабли, табиий яшаш жойларидан минглаб километр узоқликда ва яқин атрофда катта ҳайвонлар бўлмаган ҳолда бешта ёш орангутаннинг биргаликда топилиши уларнинг Одишага қандай келиб қолгани ҳақида саволлар туғдирди.

Орангутанларнинг учта маълум яшовчи тури мавжуд — Борнео, Суматра ва Тапанули — ва уларнинг барчаси Табиатни муҳофаза қилиш халқаро иттифоқи (IUCN) томонидан бутунлай йўқ бўлиб кетиш арафасидаги турлар рўйхатига киритилган.

Ўрмонларнинг кесилиши, яшаш муҳитининг йўқолиши ва ов қилиш туфайли йиллар давомида уларнинг сони кескин камайиб кетди.

Орангутанлар билан халқаро тижорат савдоси Cites — йўқ бўлиб кетиш хавфи остида турган ёввойи ҳайвонлар савдосини тартибга солувчи глобал келишувга биноан тақиқланган. Улар Ҳиндистоннинг ёввойи табиатни муҳофаза қилиш қонунлари билан ҳам ҳимояланган.

Шундай бўлса-да, орангутанлар ҳанузгача экзотик уй ҳайвонлари сифатида сотиш ва хусусий коллекционерлар учун контрабанда қилинмоқда.

Бу Ҳиндистонда ёш орангутанларнинг топилиши билан боғлиқ биринчи ҳолат эмас.

2022 йилда Ассам ва Мизорам чегараси яқинидаги назорат-ўтказиш пунктида ташлаб кетилган иккита орангутан боласи топилган эди. Расмийлар улар Ҳиндистонга қўшни Мьянма орқали олиб кирилган деб гумон қилишган.