Ҳиндистон фуқароси Эверест базавий лагери яқинида иккита вертолёт тўқнашиб кетиши оқибатида ҳалок бўлди
Иккита вертолёт базавий лагерь яқинидаги бир хил жойга қўнишга уринганидан сўнг, ердан атиги бир неча метр баландликда тўқнашиб кетди.
Эверест базавий лагери яқинида икки вертолёт тўқнашиб кетиши оқибатида Ҳиндистон фуқароси ҳалок бўлди
Эверест тоғининг базавий лагери яқинида қўнишга уринаётган икки вертолёт тўқнашиб кетиши оқибатида ҳиндистонлик сайёҳ ҳалок бўлди, деб хабар берди икки нафар расмий BBC’га.
Ҳалокатнинг тасдиқланган видеотасвирларида маҳаллий вақт билан соат 08:15 атрофида (Гринвич бўйича 02:30) Эверест базавий лагеридан тахминан 12 км (7 миль) жанубда жойлашган Фериче қишлоғида қўнишга келаётган икки вертолётнинг парраклари бир-бирига тегиб кетганини кўриш мумкин.
Fishtail Air вертолёт компанияси ҳалок бўлган шахс Ҳиндистон фуқароси Васант Кумар Баларамуду эканини маълум қилди.
Компания тўқнашувда унинг ҳаво кемаларидан бири иштирок этганини, яна бир йўловчи ва вертолёт капитани жароҳат олганини билдирди.
Fishtail Air баёнотида айтилишича, жароҳатланган йўловчилар ва экипаж аъзолари қутқарилиб, Катмандуга эвакуация қилинган.
Солухумбу округи расмийси Бхупендра Тхапа BBC Nepal хизматига жароҳатланган йўловчи Янги Зеландиядан келган сайёҳ эканини айтди.
Ҳалокатда иштирок этган иккинчи вертолёт Air Dynasty компанияси томонидан бошқарилган ва юк ташиётган эди, дейилади компания хабарида.
Бортда бир нафар экипаж аъзоси бўлган ва ҳеч ким жароҳат олмагани қўшимча қилинган.
Непал Фуқаро авиацияси бошқармаси намояндаси Гянендра Бхул шундай деди: "Ҳалокат икки вертолёт... бир жойга қўнишга уринганида содир бўлганга ўхшайди".
Ҳодиса видеосида ҳаво очиқ бўлгани, кучли шамол таъсири кўринмагани акс этган. Вертолётлардан бири бошқасига қараганда тезроқ пастлаётганини кўриш мумкин.
Ҳималай тоғларидаги ушбу мамлакатда мураккаб рельеф сабабли транспорт воситаси сифатида вертолётлардан кенг фойдаланилади. Бироқ, об-ҳавонинг тез ўзгариши ва юқори баландлик кўпинча парвозларни хавфли қилади.
Дунёнинг энг баланд тоғи бўлмиш Эверест чўққисига чиқиш альпинистик йўналишида жойлашган Фериче қишлоғи денгиз сатҳидан 4,000 метрдан (13,120 фут) ортиқ баландликда жойлашган.
Куз фасли оммабоп альпинизм мавсуми бўлгани сабабли, ҳозирда бу минтақада Эверест ва Ама Даблам чўққиларига чиқиш экспедициялари бўлиб ўтмоқда.