Ҳиндистон фуқаролари энди 8 давлат ва Шенген визаси билан Ўзбекистонга визасиз кира олади
1-сентабрдан Ҳиндистон фуқаролари Австралия, АҚШ, Буюк Британия, Канада, Жанубий Корея, Шенген давлатлари, Янги Зеландия ёки Япониянинг кўп марталик бизнес ёки туризм визасига эга бўлса, Ўзбекистонга 30 кунгача визасиз кириши мумкин. Бунинг учун ўз ёки учинчи давлатга авиачиптаси бўлиши керак.
Ҳиндистон фуқаролари эндиликда 8 та давлат ва Шенген визаси билан Ўзбекистонга визасиз кириш имкониятига эга бўладилар.
2026-йил 1-сентабрдан бошлаб, Ҳиндистон фуқаролари маълум давлатларнинг амалдаги кўп марталик бизнес ёки туризм визасига эга бўлган тақдирда, Ўзбекистонга 30 кунгача визасиз киришлари мумкин бўлади. Бу янги тартиб Президентнинг 2026-йил 29-августдаги ПФ-180-сонли фармони билан тасдиқланди.
Визасиз кириш ҳуқуқига эга бўлиш учун Ҳиндистон фуқароси қуйидаги давлатлардан бирининг амалдаги кўп марталик бизнес ёки туризм тоифасидаги кириш визасига эга бўлиши шарт:
* Канада
* АҚШ
* Буюк Британия
* Шенген ҳудуди давлатлари
* Япония
* Австралия
* Янги Зеландия
* Жанубий Корея
Бундан ташқари, фуқаро ўз мамлакатига ёки учинчи давлатга учиш учун авиачипта тақдим этиши лозим.
Визасиз режим хорижий виза амал қиладиган давр мобайнида Ўзбекистонга кирган кундан бошлаб 30 кунгача бўлган муддатга амал қилади.
Яъни, Ҳиндистон фуқароси юқорида санаб ўтилган давлатлардан бирининг амалдаги кўп марталик бизнес ёки туризм визасига эга бўлса ва Ўзбекистондан кейинги йўналишга авиачипта кўрсаца, алоҳида Ўзбекистон визасини олиши талаб этилмайди.
Эслатиб ўтамиз, 29-30-август кунлари Ҳиндистон бош вазири Нарендра Моди Ўзбекистонга ташриф буюрган эди. Музокаралар давомида икки давлат 2030-йилгача ўзаро товар айирбошлаш ҳажмини 5 миллиард долларга етказиш бўйича зарур чораларни кўришга келишиб олдилар. Ҳукуматлар ўртасида турли соҳалардаги ҳамкорликни кенгайтиришга қаратилган 12 та ҳужжат имзоланди.