Ҳинд хонандаси Анув Жаин Болливуд кўмагисиз муваффақиятга эришгани ҳақида
Юлдуз нима учун мусиқа чиқаришда «жуда инжиқ» эканини очиқлади ва келажакдаги ҳамкорлик умидлари билан ўртоқлашди.
Ҳинд хонандаси Анув Жаин Болливуд кўмагисиз муваффақиятга эришгани ҳақида
Қўшиқчи ва муаллиф Ҳиндистон мусиқа оламида акустик инди-поп ижрочиси сифатида қандай қилиб карьера қургани ҳақида гапириб берди.
Ҳинд санъаткори Болливуд машинасидан ташқарида, чиндан ҳам шахсий туюладиган мусиқа яратиб, муваффақиятга эриша оладими? Анув Жаиннинг фикрича, ҳа — ва бу ҳатто «гўзал» бир нарсага айланиши мумкин.
Қўшиқчи ва муаллифнинг майин овози YouTube'да юз миллионлаб кўришлар сонини тўплади, бу Ҳиндистон мусиқа индустриясидаги мустақил ижрочи учун кичик ютуқ эмас.
BBC Newsbeat Жаин билан унинг илк жаҳон турнеси доирасидаги Европа бўйлаб сўнгги концертларига тайёргарлик кўраётган пайтда учрашиб, нима учун у шошилмасдан ҳаракат қилаётгани ва «яхшиликдан умид қилаётгани» сабабларини билиб олди.
«Гап рақамларда эмас», — дейди Жаин Лондондаги Roundhouse залида чипталари тўлиқ сотилган концерти олдидан саҳна ортида биз билан суҳбатда.
Бироқ рақамлар ҳам кўп нарсадан дарак беради.
Ҳиндистоннинг Панжоб минтақасидаги Лудхиана шаҳридан бўлган Жаин ўсмирлик чоғидан қўшиқ куйлашни бошлаган.
Ўшандан бери унинг муносабатлар ва айрилиқ ҳақидаги таъсирли ҳикояларга бой қўшиқлари YouTube'да юз миллионлаб марта кўрилди.
Жаин асосан ҳинд тилида куйлайди ва унинг қўшиқлари кўпинча севги ва соғинч каби чуқур туйғуларни ифодалайди.
Мухлисларининг айтишича, унинг мусиқаси худди уларнинг ҳаётига соундтрекдек ва улар учун жуда қадрли туюлади.
Одамлар қалбига осон йўл топа оладиган услуби унга Instagram'да 3,9 миллион кузатувчи ва Spotify'да ойига 20 миллиондан ортиқ тингловчи келтирди.
Жаиннинг айтишича, унинг муваффақияти сири жуда оддий.
У мусиқа ёзаётганда, машинада кетаётган, югуришга чиққан ёки тунда ёлғиз ўтирган одам бу қўшиқни эшитганда нималарни ҳис қилишини тасаввур қилади.
«Мен шунчаки яхши қўшиқ яратишга ҳаракат қиламан, ўзим тинглашни хоҳлайдиган, онам, синглим ва рафиқам эшитишни яхши кўрадиган нарса яратаман», — дейди у.
«Қайсидир сабабга кўра, бизнинг мусиқий дидимиз шунчалик майинки, биз уни тақдим этганимизда, буларнинг барчасини тинглашни истовчи миллионлаб одамлар топилади».
Жаин Болливуд кўмагисиз катта мухлислар аудиториясини тўплай олди, ваҳоланки, ушбу киноиндустрия анъанавий равишда ҳинд мусиқасида санъаткорлар учун имкониятлар ва йирик молиялаштириш билан устуворлик қилиб келган.
У мамлакат киноиндустрияси билан боғлиқ шўх кино соундтреклари ва драматик балладалардан фарқли равишда ўзгача йўналишни таклиф қилаётган мустақил мусиқачиларнинг янги авлоди вакилидир.
Жаиннинг айтишича, у каби санъаткорлар «муқобил маконда» фаолият юритади.
«Биз мусиқани ўзимиз чиқарамиз ва яхшиликдан умид қиламиз», — дейди у.
Жаиннинг AP Dhillon билан ҳамкорликдаги «Jo Tum Mere Ho» ва «Afsos» қўшиқлари Осиё мусиқа чартларида (Asian Music Charts) биринчи ўринга кўтарилди, бироқ у ўз муваффақияти ортида ҳеч қандай тайёр формула йўқлигини айтади.
Муайян даврда Жаин йилига атиги битта қўшиқ чиқарар эди.
Унинг айтишича, у тақдим этадиган ижод намуналарига «жуда инжиқлик билан» ёндашади ва яқин-яқингача йилига фақат битта қўшиқ чиқарган.
Аммо бу вазият ўзгариши кутилмоқда ва у янги қўшиқлар «жуда тез орада» чиқишини айтди.
«Улар тайёр ва менимча, жуда гўзал қўшиқлар бўлди, шунинг учун бу йил кўпроқ мусиқа эшитишингиз мумкин», — дейди у.
«Бу шунчаки битта қўшиқ тақдимоти бўлмайди, келинг, бу қандай чиқишини кузатайлик».
Унинг таъкидлашича, лойиҳани якунига етказиш жуда муҳим, эҳтимол шунинг учун ҳам у чиқарадиган қўшиқларига эҳтиёткорлик билан ёндашади.
«Ҳозир менда чала қолган ёки ҳали якунламаган лойиҳаларим йўқ.
«Лойиҳани бошладимми, уни албатта охирига етказаман. Яъни, менда ғоялар бўлиши мумкин, лекин ёзишни бошлашим билан уни якунлайман».
Оддийлик иш бераётганга ўхшайди, Жаин қўшиқларининг айрим қисмлари, масалан, «Arz Kiya Hai» мухлислари орасида жуда оммалашиб, TikTok ва Instagram'да вирусдек тарқалди.
Хонанда гитара ҳам чалади ва чуқур туйғулар ҳамда мавзулардаги қўшиқлари билан танилган.
Сўнгги йилларда ғарб мусиқаси ва ҳинд мусиқасининг энг йирик намояндалари ўртасида нуфузли ҳамкорликлар амалга оширилди.
Жаин каттароқ юлдузлар билан ҳамкорлик қилишга тайёрлигини, лекин бу фақат унинг ўзлиги сақланиб қолган ва ҳамма нарса «тўғри йўл билан» қилинган тақдирдагина амалга ошишини айтади.
«Шунчаки каттароқ ном қўшилгани учун қўшиқдаги ҳикоя ўз мазмунини йўқотмаслиги керак», — дейди у.
Бироқ у қўшимча қилади: «Мен ҳали у даражага етганим йўқ».
Шунга қарамай, Жаин «Official Singles Chart» ва «Official Asian Music Chart» чартларида муваффақият қозонган «One Direction» гуруҳининг собиқ аъзоси Зайн Малик билан ҳамкорлик қилишни тасаввур қила олишини айтади.
«У мен яратадиган мусиқа тури билан жуда яхши чиқиша оладиган инсон бўларди», — дейди Жаин.
«Балки коинот буни амалга оширар».