“Ҳейт қилманг, акс ҳолда кетаман”: Женнифер Лоуренс ижтимоий тармоқда аккаунт очди ва обуначиларига ултиматум қўйди

“Ҳейт қилманг, акс ҳолда кетаман”: Женнифер Лоуренс ижтимоий тармоқда аккаунт очди ва обуначиларига ултиматум берди

Женнифер Лоуренс кўп йиллар давомида ижтимоий тармоқлардан фойдаланмай келган кам сонли Голливуд юлдузларидан бири эди. Ҳамкасблари селфилар, реклама интеграциялари ва постлари билан бўлишаётган бир пайтда “Оскар” совриндори ўзини четда тутиб келди. Аммо бу ҳафта у аккаунт очди ва буни ўзига хос услубида — самимий, дангал ва ҳазил-мутойиба билан амалга оширди.

@жлав аккаунти 9-сентябр, чоршанба куни очилди. Профил тавсифидаёқ Женнифер Лоуренс нега ўзининг тўлиқ исмини ололмаганини изоҳлади: “женниферлавренсе банд эди”. Шунинг ўрнига у мухлислар ва матбуот аллақачон ишлатиб келаётган никни танлади. Аватарда актрисанинг сартарошхона креслосида ўтирган кулгили сурати жойлаштирилди, биринчи видеони эса у уйқусираб ётган ҳолатда тасвирга олди.

Ушбу видеода “Ҳаёт-мамот ўйинлари”нинг 36 ёшли юлдузи обуначиларига огоҳлантириш билан мурожаат қилди ва бу хабар дарҳол тарқалиб кетди.

“Мен бунга имкон беряпман, агар кимдир бирор салбий гап айца, мен кетаман. Дарҳол. Гап-сўзсиз”, деди у. Ва яна қўшимча қилди: “Агар кимдир ёмон нарса ўйласа ҳам, мен буни билиб оламан. Ва кетаман”.

Видео бир зумда оммалашди. Дастлабки суткада аккаунт 978 мингдан ортиқ обуначи йиғди, пайшанба куни кечқурунга келиб эса бу кўрсаткич 3,6 миллиондан ошди. Мухлислар Лоуренснинг ижтимоий тармоқдаги пайдо бўлишини худди совғадек қабул қилишди ва агар кимдир унга ножўя бирор нарса ёзишга журъат эца, бу тарихдаги энг қисқа ижтимоий тармоқ тажрибаси бўлиши ҳақида дарҳол ҳазиллаша бошлашди.

Қизиғи шундаки, Лоуренс узоқ вақтдан бери ижтимоий тармоқларни танқид қилиб келган. 2018-йилдаги интервюсида у улар “мияни емириши”ни ва одамлар нега уларга бунчалик кўп вақт сарфлашини тушунмаслигини айтган эди. Ўшанда актриса ўз ҳаётини омма олдида кўз-кўз қилишдан маъно кўрмаслигини тан олганди. Бироқ замон ўзгармоқда ва, афтидан, актриса буни синаб кўришга қарор қилди — аммо ўз шартлари асосида.

Бу қадам Женнифер Лоуренснинг Марвелъга қайтиши мумкинлиги ҳақидаги муҳокамаларнинг янги тўлқинига тўғри келди. Актриса “Икс одамлар” туркумининг тўртта филмида — “Биринчи класс” (2011), “Ўтган келажак кунлари” (2014), “Апокалипсис” (2016) ва “Қора Феникс” (2019) филмларида Мистик ролини ижро этган. Мухлислар унинг қайтишини узоқ вақтдан бери кутаётган бўлса-да, Марвел томонидан расмий тасдиқ йўқ. Бундан ташқари, бўлажак “Қасоскорлар: Қиёмат куни” филмида Мистик ролини асл трилогияда ушбу қаҳрамонни ўйнаган Ребекка Ромейн ижро этади.

Женнифер Лоуренснинг ўзи яна соатлаб вақтини гримхонада ўтказишидан хурсанд эмаслигини бир неча бор айтган. Марвел уни қайтармоқчи бўлса ҳам, актрисанинг бу ролга рози бўлиши аниқ эмас. Ҳозирча эса актрисанинг аккаунти кундан кунга ўсиб бормоқда.