Ҳайдовчилик имтиҳонини кутиш вақти икки йиллик энг паст даражага тушди - лекин ҳали ҳам ўртача 20 ҳафтани ташкил этмоқда
Сентябрь ойида ҳайдовчиликка ўрганувчилар амалий имтиҳон топшириш учун ўртача 19,7 ҳафта, яъни тахминан беш ой кутишларига тўғри келди.
Ҳайдовчилик имтиҳонини кутиш вақти охирги икки йилдаги энг паст даражага тушди, бироқ у ҳали ҳам ўртача 20 ҳафтани ташкил этмоқда
Расмий маълумотларга кўра, ҳайдовчилик имтиҳонларини кутиш вақти 2024 йилнинг ноябрь ойидан бери биринчи марта 20 ҳафтадан пастга тушди.
Шунга қарамай, сентябрь ойида ўрганувчи ҳайдовчилар амалий имтиҳон топшириш учун ҳали ҳам ўртача 19,7 ҳафта, яъни беш ойга яқин кутишган.
Ҳайдовчилар ва транспорт воситалари стандартлари агентлиги (DVSA) ушланиб қолишларни камайтириш ва 2020 йилдаги Ковид пандемияси даврида юзага келган навбатларни бартараф этиш устида ишламоқда.
Бир ҳайдовчилик ўргатувчиси агентликнинг эришган ютуқларига жавобан BBC га шундай деди: "Менимча, бу мақтанса арзийдиган нарса эмас."
DVSA дастлаб ўтган йилнинг охиригача ўртача кутиш вақтини етти ҳафтагача камайтиришни мақсад қилган эди.
Транспорт вазири Ҳайди Александер кейинчалик бу муддатни 2026 йилнинг ёзига сурди, аммо кейинчалик бунга ҳам эришиб бўлмаслигини, эндиликда кутиш вақти келаси кузгача етти ҳафтага тушиши кутилмаётганини айтди
Сентябрь ойида DVSA 191 682 та амалий ҳайдовчилик имтиҳонини ўтказди ва уларнинг ярмидан кўпи муваффақиятли топширилди.
Ўрганувчи ҳайдовчилар BBC га ҳайдовчилик имтиҳонларига киришнинг чеклангани уларнинг эркинлиги, таълими ва иш имкониятларини чеклаб қўйганини бир неча бор таъкидлашган.
Шу йилнинг бошигача кўплаб ўрганувчи ҳайдовчилар имтиҳон жойларини ўрганувчилар банд қилишидан олдин автаматлаштирилган дастурлар ёки ботлардан фойдаланиб, оммавий равишда банд қилиб олган ва қайта сотувчи учинчи томон провайдерларидан оширилган нархларда сотиб олишган.
DVSA жорий йил бошида имтиҳонларни банд қилиш тизимидан суиистеъмол қилинишининг олдини олиш учун бир қанча ўзгартиришлар киритди. Эндиликда фақат ўрганувчи ҳайдовчининг ўзигина ҳайдовчилик имтиҳонини банд қила олади.
Уотфордлик ҳайдовчилик ўргатувчиси Софи Стачфилд илгари BBC га хабар алмашиш гуруҳларида қайта сотувчилар томонидан сотга қўйилган юзлаб ҳайдовчилик имтиҳонларини кўрсатган эди
Уотфордлик ҳайдовчилик ўргатувчиси Софи Стачфилд BBC га шундай деди: "Имтиҳонларни қайта сотиш тўхтатилганга ўхшайди ва бу жуда ижобий ҳолат бўлса-да, улар ҳали ҳам талабни қондириш учун етарлича имтиҳон олувчиларни ишга қабул қила олишмади."
Унинг айтишича, кутиш вақтининг бир оз камайиши "мақтанса арзийдиган нарса" эмас ва кўп жойларда имтиҳонни банд қилишдаги кутиш вақти 21 ҳафтани ташкил этмоқда.
"Кўп ҳолларда, менинг ҳайдовчиларим душанба куни 5:45 да уйғонишади, аммо барибир имтиҳонсиз қолишади, чунки улар бирор нарсани босиб, ўз маълумотларини киритгунча, имтиҳон аллақачон банд қилингани айтилади."
Софининг қўшимча қилишича, имтиҳонни кутиш вақти узоқлиги сабабли "ҳатто ҳайдовчилик сабоқларини бошламаган" кўплаб ўрганувчи ҳайдовчилар "имтиҳонга 5 ой борлигини билиб, уни олдиндан банд қилиб қўйишади", бу эса ўзларини ва ўргатувчини катта босим остига қўяди.
Автомобиль йўллари вазири Жастин Маддерснинг айтишича, ҳукумат "рекорд даражадаги кутиш вақтлари ва катта ҳажмдаги навбатларни мерос қилиб олган".
"Ҳайдовчилик имтиҳонини кутиш вақти ҳали биз хоҳлаган даражада бўлмаса-да, ушбу рақамлар ҳақиқий илгарилаш борлигини кўрсатмоқда", дея қўшимча қилди у.
DVSA вакили агентлик "кутиш вақтларини камайтиришга содиқ" эканини ва "имтиҳон олувчилар сони 2017 йилнинг ноябридан бери энг юқори даражада" эканини айтди.
"Биз ҳали қилинадиган ишлар кўплигини биламиз ва ҳар бир ўрганувчи ҳайдовчиликни қаерда ўрганаётганидан қатъи назар, керак бўлганда имтиҳон жойини олмагунича тўхтамаймиз", дея қўшимча қилди вакил.