Ҳар бир идиш учун 150 сўм: Ўзбекистонда фандоматлар ўрнатилди
Ўзбекистонда пластик, шиша ва алюмин ичимлик идишларини қабул қилиб, ҳар бири учун 150 сўм тўлайдиган фандоматлар ишга туширилди. Фуқаролар маблағни Слиск электрон ҳамёнига ўтказиши ёки хайрияга йўналтириши мумкин.
Ҳар бир идиш учун 150 сўм: Ўзбекистонда фандоматлар ўрнатилди
Чиқиндиларни бошқариш ва сиркуляр иқтисодиётни ривожлантириш агентлиги берган маълумотга кўра, қурилмалардан бири Экология қўмитаси биноси олдига, яна бири эса Сурхондарё вилояти марказига ўрнатилиб, фойдаланишга топширилди.
Бу ташаббус агентлик ва Норвегияда чиқиндиларни автоматик йиғиш ҳамда саралаш технологиялари йўналишида фаолият юритувчи ТОМРА компанияси ҳамкорлигида амалга оширилаётган пилот лойиҳа доирасида йўлга қўйилди. Лойиҳа ичимлик идишларини алоҳида йиғиш ва уларни қайта ишлашга топширишни рағбатлантиришга қаратилган.
Фандоматдан фойдаланган фуқаро икки йўлдан бирини танлаши мумкин. Биринчи вариантда қабул қилинган ҳар бир идиш учун 150 сўм унинг Слиск электрон ҳамёнига ўтказилади. Иккинчи вариантда эса маблағ хайрия мақсадлари ва дарахт экиш ташаббусларига йўналтирилади.
Агентлик маълумотига кўра, лойиҳанинг асосий мақсади чиқиндиларни саралашни кундалик одатга айлантириш ва аҳолининг экологик маданиятини оширишдан иборат. Шунингдек, фойдаланилган ичимлик идишлари қайта ишланадиган ва иқтисодий қийматга эга ресурс эканини кўрсатиш ҳам кўзланган.
Пилот лойиҳа ўзини оқласа, фандоматларни республиканинг бошқа ҳудудларидаги аҳоли гавжум жойларга ҳам босқичма-босқич ўрнатиш режалаштирилган.