Гвардиола режаларини ошкор қилди
Гвардиола келажакдаги режаларини ошкор этди
"Манчестер Сити"нинг собиқ бош мураббийи Пеп Гвардиола клубни тарк этганидан сўнг мураббийлик фаолиятига қайтмаслиги мумкинлигини маълум қилди. Испаниялик мутахассис узоқ йиллик фаолиятидан сўнг футболдан бироз узоқлашиб, шахсий ҳаётига эътибор қаратиш ниятида.
55 ёшли Гвардиола 2016-йилдан буён бошқарган "Манчестер Сити"ни ўтган мавсум якунида тарк этди. У мураббийлик фаолиятидаги кейинги режалари ҳақида "А Беаутифул Обсессион" ҳужжатли филмида ўз фикрларини билдирди.
"Кейин нима билан шуғулланишимни ўзим ҳам билмайман. Қайтиш қийин бўлади — ҳеч бўлмаганда ҳозир ўзимни шундай ҳис қиляпман. Шахсий ҳаётимда юз берган кўплаб воқеаларни англаб олишим керак", деди Гвардиола.
Мутахассис узоқ йиллик мураббийлик фаолиятидан сўнг танаффус олиш, бошқа машғулотларга вақт ажратиш ва футболдан бир муддат четлашишни режалаштирмоқда.
"Ўзимга кўпроқ эътибор қаратишим ва бошқа ишлар билан шуғулланишим керак. Шунчаки тўхтаб, бир муддат ҳамма нарсадан узилиб туришни хоҳлайман. Ҳозирги асосий мақсадларимдан бири шу", дея қўшимча қилди у.
Гвардиола "Манчестер Сити" билан Англия чемпионатида олти марта ғолиб чиқди. Шунингдек, унинг қўл остида жамоа уч бор Англия Кубоги ва Англия Суперкубогини қўлга киритди. "Шаҳарликлар" Гвардиола бошқарувида илк бор Чемпионлар Лигаси, УЕФА Суперкубоги ва клублар ўртасидаги Жаҳон чемпионатида ҳам зафар қучди.
Англияга келишидан аввал Гвардиола "Барселона" ва "Бавария" клубларида ҳам фаолият юритган ҳамда ҳар икки жамоа билан катта муваффақиятларга эришган.